8 కేసుల్లోనూ బెయిల్… రేపు కాకాణి రిలీజ్

వైసీపీ సీనియర్ నేత, మాజీ మంత్రి కాకాణి గోవర్థన్ రెడ్డికి దాదాపుగా 3 నెలల తర్వాత ఒకింత ఊరట లభించింది. రుస్తుం మైనింగ్ కేసులో అరెస్టు అయిన కాకాణిపై ఆ తర్వాత వరుసబెట్టిన మరో 7 కేసులు నమోదు అయ్యాయి. దీంతో ఓ కేసులో బెయిల్ వచ్చినా మరో కేసులో ఆయనకు బెయిల్ రాకపోవడంతో ఆయన నెల్లూరు జైలులో 85 రోజుల పాటు విచారణ ఖైదీగా ఉండాల్సి వచ్చింది. ఇప్పటిదాకా 7 కేసుల్లో బెయిల్ రాగా… తాజాగా సోమవారం ఏపీ హైకోర్టు రుస్తుం మైనింగ్ కేసులోనూ కాకాణికి బెయిల్ మంజూరు చేయడంతో ఆయన మంగళవారం జైలు నుంచి విడుదల కానున్నారు.

వైసీపీ అధికారంలో ఉండగా… చేతిలోని మంత్రిదండాన్ని ఝుళిపించిన కాకాణి ఇష్టారాజ్యంగా వ్యవహరించారన్న ఆరోపణలు ఉన్నాయి. ఈ ఆరోపణల్లో ప్రధానమైనది రుస్తుం మైనింగ్ నుంచి భారీ ఎత్తున అక్రమ మైనింగ్ ను కొనసాగించడం. దీనిపై ఇదివరకే కేసు నమోదు కాగా… కాకాణి అనుచరులు అరెస్టయ్యాయి. అయితే నాడు మంత్రిగా ఉన్న కాకాణి ఈ కేసు తన మీదకు రాకుండా చూసుకున్నారు. కూటమి ప్రభుత్వం అధికారం చేపట్టిన తర్వాత ఈ కేసును మరింత లోతుగా పరిశీలించి ప్రధాన నిందితుడు కాకాణినే అని తేల్చి ఆయన పేరును కేసులో చేర్చింది.

ఈ క్రమంలో విచారణకు రమ్మంటూ కాకాణిని పోలీసులు పిలవగా… వారి నోటీసులు తీసుకోకుండా కాకాణి పోలీసు శాఖను ఓ రేంజిలో ముప్పుతిప్పలు పెట్టిన సంగతి తెలిసిందే. అయితే లెక్కలేనన్ని నోటీసులకు ఉద్దేశపూర్వకంగానే కాకాణి తప్పించుకుంటున్నారన్న భావనకు వచ్చిన పోలీసులు కాకాణి అరెస్టుకు రంగం సిద్ధం చేశారు. ఈ విషయం తెలుసుకున్న కాకాణి కేరళ వెళ్లిపోయారు. అయితే పోలీసులు ఆయన ఆచూకీని గుర్తించి కేరళకే వెళ్లి మరీ ఆయనను అరెస్టు చేశారు. అప్పటినుంచి కాకాణి నెల్లూరు జైలులోనే కాలక్షేపం చేయక తప్పలేదు.