పవన్ కు లోకేశ్ జత… మొగల్తూరు హైస్కూల్ కు మహార్థశ

మొగల్తూరు… మెగాస్టార్ చిరంజీవి సొంతూరు. ఆ ఊరిలోని జిల్లా పరిషత్ ఉన్నత పాఠశాల పాతబడిపోయింది. సర్కారీ పాఠశాలలకు నిధులు విడుదల కావడమే గొప్ప. అలాంటిది అప్పటికే ఉన్న భవనాలను ఆధునీకరించేందుకు నిధులు అంటే అస్సలు ఊహించడానికే వీలు కాదు. అలాంటిది ఇప్పుడు మెగాస్టార్ సోదరుడు, జనసేన అదినేత పవన్ కల్యాణ్ పుణ్యమా అని మొగల్తూరు హైస్కూల్ కు మహార్దశే పట్టింది. తన స్వగ్రామం అభివృద్ధిపై పవన్ దృష్టి సారించిన సంగతి తెలిసిందే. ఈ క్రమంలో మొగల్తూరు గ్రామంలోని జడ్పీ హైస్కూల్ అభివృద్ధి దిశగా పవన్ బృందం ఆలోచన చేయగా… దానికి టీడీపీ జాతీయ ప్రధాన కార్యదర్శి, ఏపీ విద్యా శాఖ మంత్రి దన్నుగా నిలిచారు. అంతే… మొగల్తూరు జడ్పీ పాఠశాల ఆధునీకరణకు ఏకంగా రూ.1.71 కోట్లు మంజూరయ్యయి.

పట్టణాల్లోని మునిసిపల్ పాఠశాలల పరిస్థితి ఓ మోస్తరుగా ఉంటుంటే… గ్రామాల పరిధిలోని మండల పరిషత్ ప్రాథమిక పాఠశాలలు, జిల్లా పరిషత్ ఉన్నత పాఠశాలల పరిస్థితి అంతంత మాత్రమేనని చెప్పాలి. వీటికి ఒక్కసారి భవనాలు నిర్మిస్తే మళ్లీ వాటి వైపు చూసే నాథుడే ఉండడని చెప్పాలి. ఏదో పిల్లల సంఖ్య అనూహ్యంగా పెరిగితే… అదనపు గదుల నిర్మాణం తప్పించి.. ఉన్న భవనాల ఆధునీకరణ అన్న మాటే దాదాపుగా వినిపించదు. ఈ కారణంగానే మొగల్తూరులోని జిల్లా పరిషత్ ఉన్నత పాఠశాల భవనాల గురించి కూడా ఇప్పటిదాకా ఎవరూ పట్టించుకోలేదనే చెప్పాలి. ఏదో మెగాస్టార్ చిరంజీవి సొంతూరు అన్న మాటే తప్పించి… మొగల్తూరుకు అంతగా ప్రాధాన్యం కూడా లేదు. ఈ క్రమంలో ఈ ఊరిని అన్ని ఊర్ల మాదిరిగే ఎవరూ పట్టించుకోలేదు.

ఇలాంటి క్రమంలో పవన్ కల్యాణ్ ఏకంగా ఏపీకి డిప్యూటీ సీఎంగా కావడం… అందులోనూ గ్రామీణాభివృద్ధి శాఖను ఆయన అడిగి మరీ తీసుకోవడం… పల్లె ప్రగతి అంటూ నిత్యం పవన్ జపిస్తూ ఉండటంతో రాష్ట్రంలోని చాలా పల్లెల రూపు రేఖలు ఇప్పటికే మారిపోయాయి. రహదారి అంటే ఏమిటో తెలియని గ్రామాలకు పవన్ పుణ్యమా అని రహదారి సౌకర్యం వచ్చేసింది. ఆ క్రమంలోనే తన సొంతూరుపైనా పవన్ దృష్టి సారించడం, అందులో భాగంగా పవన్ బృందం ఇటీవలే ఆ గ్రామంలో పర్యటించిన జరిగింది. ఈ సందర్భంగా పడుబడిపోయిన గుహలా ఉన్న జడ్పీ హైస్కూల్ ను ఆధునీకరిద్దామని ఆ బృందం నిర్ణయించగా.. ఈ విషయం తెలుసుకున్న లోకేశ్… దాని అభివృద్ధికి రూ.1.71 నిధులను మంజూరు చేస్తూ పవన్ సంకల్పానికి వెన్నుదన్నుగా నిలిచారు. అటు పవన్ సంకల్పం, ఇటు లోకేశ్ సహకారంతో అతి త్వరలోనే మొగల్తూరు జడ్పీ హైస్కూల్ రూపు రేఖలు సమూలంగా మారిపోనున్నాయని చెప్పక తప్పదు.