జగన్ ప్లాన్ తో విజయసాయి రాజీనామా: షర్మిల

వైసీపీ నేత విజయసాయిరెడ్డి తన రాజ్యసభ సభ్యత్వానికి రాజీనామా చేసిన వైనం ఇరు తెలుగు రాష్ట్రాలలో హాట్ టాపిక్ గా మారిన సంగతి తెలిసిందే. ఈ క్రమంలోనే ఆయన రాజీనామాపై ఏపీ పీసీసీ అధ్యక్షురాలు వైఎస్ షర్మిల సంచలన వ్యాఖ్యలు చేశారు. విజయసాయి రెడ్డి వంటి నాయకులే జగన్ ను వదిలేస్తున్నారంటే వైసీపీలో పరిస్థితి ఏంటో అర్థం చేసుకోవచ్చని షాకింగ్ కామెంట్లు చేశారు. నాయకుడిగా జగన్ ఓడిపోయారని, విశ్వసనీయతను కోల్పోయిన నాయకుడు జగన్ అని విమర్శించారు.

జగన్ అనుమతి లేకుండా విజయసాయిరెడ్డి రాజీనామా చేయరని, ఆయన పార్టీని వీడడం చిన్న విషయం కాదని అన్నారు. విజయసాయిరెడ్డిని జగన్ పక్కా ప్లాన్ తో బీజేపీలోకి పంపుతున్నారని షర్మిల ఆరోపించారు. విజయసాయి గతంలో ఎన్నో అబద్ధాలు చెప్పారని, ఇప్పుడు నిజాలేంటో బయటపెట్టాలని డిమాండ్ చేశారు. 2024 ఎన్నికల తర్వాత ఒక్కొక్కరిగా జగన్‌ ను వదిలి వెళ్లిపోతున్నారని షర్మిల అన్నారు.

బీజేపీకి, మోదీకి జగన్ దత్త పుత్రుడు అని, బీజేపీ దగ్గర విజయసాయిని ఉంచి కేసుల విచారణ సాగకుండా జగన్ చేశారని షర్మిల ఆరోపించారు. వివేకా హత్య కేసులో జగన్ చెప్పమన్న అబద్దాలు విజయసాయి చెప్పారని, ఇప్పటికైనా ఆయన నిజాలు చెబితే ప్రజలు హర్షిస్తారని అన్నారు. తన కుటుంబంపై, తనపై, తన పిల్లలపై ఇష్టం వచ్చినట్లుగా విజయసాయి విమర్శలు చేశారని గుర్తు చేసుకున్నారు.