ఫాలోవర్స్ 56 లక్షలు..ఓట్లు 146

ఈ సోషల్ మీడియా జమానాలో యూబ్యూటర్లు, ఇన్ స్టా ఇన్ ఫ్లూయన్సర్లు, బ్లాగర్లూ ఎక్కువయ్యారు. ఆయా మాధ్యమాల్లో ఎంత ఎక్కువ మంది ఫాలోయింగ్ ఉంటే అంత క్రేజ్. ఆ క్రేజ్ వల్ల పాపులర్ అయి బిగ్ బాస్ కంటెస్టెంట్, సినిమాల్లో నటించే చాన్స్ కొట్టేసిన వారు కూడా ఉన్నారు. అయితే, ఆ క్రేజ్ వాడుకొని ఎన్నికల్లో గెలవాలనుకుంటే కుదరదన్న సంగతి మహారాష్ట్ర ఎన్నికల ఫలితాలతో స్పష్టమైంది. ఇన్‌స్ట్రాగ్రామ్‌ లో 56 లక్షల మంది ఫాలోవర్లున్న నటుడు అజాజ్ ఖాన్ కు కేవలం 146 ఓట్లు వచ్చిన వైనం ఇప్పుడు సోషల్ మీడియాలో వైరల్ గా మారింది.

మహారాష్ట్ర అసెంబ్లీకి జరిగిన ఎన్నికల్లో బిగ్ బాస్ మాజీ కంటెస్టెంట్, బాలీవుడ్ నటుడు అజాజ్ ఖాన్ ఆజాద్ సమాజ్ పార్టీ తరఫున వెర్సోవా అసెంబ్లీ నియోజకవర్గం నుంచి పోటీ చేశారు. యూపీలోని నగీనా ఎంపీగా ఉన్న చంద్రశేఖర్ ఆజాద్ ‘రావణ్’ ఆ పార్టీకి నేతృత్వం వహిస్తున్నారు. ఇన్‌స్ట్రాగ్రామ్‌ 5.6 మిలియన్స్ (56 లక్షల మంది) ఫాలోవర్స్ ఉన్న అజాజ్ ఖాన్ గెలుపుపై నమ్మకం పెట్టుకున్నారు.

అయితే, ఎన్నికల ఫలితాలు అజాజ్ ఖాన్ తో పాటు ఆయన ఫాలోవర్లకూ షాకిచ్చాయి. 56 లక్షల మంది ఫాలోవర్లున్న అజాజ్ ఖాన్ కు కేవలం 146 ఓట్లు మాత్రమే రావడంతో ఆయన, ఆయన ఫాలోవర్లు ఖంగుతిన్నారు. అంతేకాదు, ఇక్కడ నోటాకు దాదాపు 750 ఓట్లు వచ్చాయి. దీంతో, సోషల్ మీడియాలో ఫాలోవర్స్ కు ఓటర్లకు సంబంధం లేదని, తమ్ముడు తమ్ముడే పేకాట పేకాటే అని సోషల్ మీడియాలో కామెంట్లు వస్తున్నాయి. ఫాలోవర్స్, క్రేజ్ ఉంటే రాజకీయాల్లో రాణిస్తానుకోవడం సరికాదని సోషల్ మీడియాలో కామెంట్లు వస్తున్నాయి.