రష్మిక తర్వాత సుధీర్ బాబుతో..

‘అందాల రాక్షసి’తో మొదలుపెట్టి నటుడిగా చాలానే సినిమాలు చేసిన రాహుల్ రవీంద్రన్.. దర్శకుడిగా మారి తీసిన ‘చి ల సౌ’ అందరినీ ఆశ్చర్యపరిచింది.

తనలో ఇంత మంచి ఫిలిం మేకర్ ఉన్నాడా అనిపించేలా సున్నితమైన కథను హృద్యంగా నరేట్ చేసి ప్రశంసలు అందుకున్నాడు రాహుల్ రవీంద్రన్. ఐతే తనపై మంచి అంచనాలు నెలకొన్న సమయంలో అక్కినేని నాగార్జునతో తీసిన ‘మన్మథుడు-2’ మాత్రం దారుణమైన ఫలితాన్ని అందుకుంది.

ఆపై చాలా గ్యాప్ తీసుకుని రాహుల్.. ఒక లేడీ ఓరియెంటెడ్ మూవీ తీస్తున్నాడు. అదే.. గర్ల్ ఫ్రెండ్. సౌత్ ఇండియన్ టాప్ హీరోయిన్లలో ఒకరైన రష్మిక మందన్నా చేస్తున్న తొలి లేడీ ఓరియెంటెడ్ మూవీ ఇది.

ఓవైపు పెద్ద పెద్ద సినిమాల్లో నటిస్తూనే రాహుల్‌తో చిన్న బడ్జెట్లో ఈ సినిమా చేస్తోంది రష్మిక. గీతా ఆర్ట్స్ ఈ చిత్రాన్ని ప్రొడ్యూస్ చేస్తోంది. ఈ సినిమా విడుదల కాకముందే రాహుల్ ఇంకో సినిమాను ఓకే చేసుకున్నాడు.

మహేష్ బాబు బావ సుధీర్ బాబుతో రాహుల్ రవీంద్రన్ జట్టు కట్టబోతున్నాడు. వీరి కలయికలో సినిమా రాబోతున్న విషయంలో తాజాగా ఖరారైంది. తన కొత్త చిత్రం ‘మా నాన్న సూపర్ హీరో’ ప్రమోషన్లలో భాగంగా సుధీర్ ఈ విషయం వెల్లడించాడు.

ప్రస్తుతం సుధీర్ ‘జటాధర’ అనే ఓ భారీ పాన్ ఇండియా మూవీ చేయనున్న సంగతి తెలిసిందే. ప్రస్తుతం ఇది ప్రి ప్రొడక్షన్ దశలో ఉంది. త్వరలోనే చిత్రీకరణ మొదలవుతుంది. దీని తర్వాత రాహుల్ రవీంద్రన్‌తో తన సినిమా ఉంటుందని సుధీర్ తెలిపాడు.

ఈ కలయిక క్యూరియాసిటీ పెంచేదే. సున్నితమైన సినిమాలు తీసే రాహుల్.. సినిమా సినిమాకు వైవిధ్యం చూపిస్తున్న సుధీర్ బాబు కలయికలో ఎలాంటి సినిమా వస్తుందన్నది ఆసక్తికరం.

వచ్చే ఏడాది ద్వితీయార్ధంలో ఈ సినిమా ఉంటుందట. ‘హరోంహర’తో పర్వాలేదనిపించిన సుధీర్ బాబు ‘మా నాన్న సూపర్ హీరో’ చిత్రంతో ప్రేక్షకుల గుండెలు పిండేసేలాగే కనిపిస్తున్నాడు.