తెలుగు రాష్ట్రాల్లో ‘దేవర’ సెంచరీ

మొత్తానికి ‘దేవర’ సినిమా బాక్సాఫీస్ దగ్గర అనుకున్న దాని కంటే మెరుగైన ఫలితం దిశగా దూసుకెళ్తోంది. కొంచెం మిక్స్డ్ రివ్యూలు, టాక్ వచ్చినప్పటికీ.. తట్టుకుని తొలి వీకెండ్లో భారీ వసూళ్లు సాధించిన ఈ చిత్రం.. ఆ తర్వాత కొంచెం డల్ అయినట్లు కనిపించింది. కానీ గాంధీ జయంతి రోజు సినిమా హౌస్ ఫుల్స్‌తో నడిచింది. తర్వాతి రోజు కొంచెం వసూళ్లు తగ్గినా.. పరిస్థితి నిరాశాజనకంగా అయితే లేదు.

దసరా సెలవులను బాగా ఉపయోగించుకుంటూ ప్రతి రోజూ చెప్పుకోదగ్గ షేరే రాబడుతోంది. ఈ క్రమంలో తెలుగు రాష్ట్రాల్లో ‘దేవర’ సెంచరీ కొట్టేయడం విశేషం. ఏపీ, తెలంగాణల్లో కలిపి ‘దేవర’ షేర్ రూ.100 కోట్ల మార్కును ఆల్రెడీ దాటేసింది. బుధవారం నాటికే ఈ సినిమా ఈ మార్కును అందుకుంది.

ఆరు రోజుల వ్యవధిలో ‘దేవర’ తెలుగు రాష్ట్రాల షేర్ రూ.110 కోట్లకు చేరువైంది. నైజాంలో రూ.42 కోట్ల మేర షేర్ రావడం విశేషం. సీడెడ్లో ఈ చిత్రం రూ.22 కోట్లకు పైగా షేర్ రాబట్టింది. వైజాగ్‌లో రూ.11 కోట్లకు కాస్త ఎక్కువగా షేర్ వచ్చింది. ఏపీలోని మిగతా ఏరియాలన్నీ కలిపితే రూ.28 కోట్ల మేర షేర్ వచ్చింది. ఇక వరల్డ్ వైడ్ లెక్కలు చూస్తే ‘దేవర’ షేర్ రూ.200 కోట్లకు చేరువగా ఉండొచ్చు. గ్రాస్ వసూళ్లు రూ.300 కోట్లను దాటిపోయాయి. రెండో వీకెండ్లో కూడా సినిమా బాగా ఆడేలా కనిపిస్తోంది.

ఇటీవలే ‘దావూది రే’ పాటను యాడ్ చేశారు. దీని కోసం తారక్ ఫ్యాన్స్ మళ్లీ థియేటర్లకు వస్తారనడంలో సందేహం లేదు. ఫ్యామిలీ ఆడియన్స్ సినిమాను బాగానే చూస్తున్నారు. రెండో వీకెండ్లో సినిమా హౌస్ ఫుల్స్‌తో రన్ అయ్యే సంకేతాలు కనిపిస్తున్నాయి. దసరా సినిమాలు వచ్చే వరకు ‘దేవర’కు ఢోకా లేనట్లే.