తండ్రి సూపర్ హిట్ స్ఫూర్తితో కూతురి సినిమా

కొన్ని కాకతాళీయంగా జరిగినా వాటి వెనుక సంగతులు ఆసక్తికరంగా ఉంటాయి. వచ్చే వారం అక్టోబర్ 11 ఆర్ఆర్ఆర్ ఫేమ్ అలియా భట్ జిగ్రా విడుదల కాబోతున్న సంగతి తెలిసిందే. టాలీవుడ్ ప్రేక్షకులనూ మెప్పిస్తుందనే కారణంతో తెలుగులో డబ్బింగ్ చేసి సురేష్ ఏషియన్ ద్వారా రిలీజ్ చేయబోతున్నారు.

విశ్వం, జనక అయితే గనక, వేట్టయన్, మా నాన్న సూపర్ హీరో లాంటి స్ట్రెయిట్ మూవీస్ తో పోటీ ఉన్నప్పటికీ కంటెంట్ మీద నమ్మకంతో పెద్ద రిస్కు చేస్తున్నారు. వాసన్ బాలా దర్శకత్వం వహించిన జిగ్రాకి ఎప్పుడో 1993లో వచ్చిన ఒక సూపర్ హిట్ తో కనెక్షన్ ఉందంటే ఆశ్చర్యం కలగక మానదు.

ముప్పై ఏళ్ళ క్రితం అలియా భట్ తండ్రి మహేష్ భట్ డైరెక్షన్లో గుంరా వచ్చింది. శ్రీదేవి, సంజయ్ దత్ హీరో హీరోయిన్లు కాగా రాహుల్ బోస్ విలన్ గా నటించాడు. విదేశాల్లో అన్యాయంగా డ్రగ్స్ కేసులో ఇరుక్కున్న శ్రీదేవిని ప్రాణాలకు తెగించి జైలు నుంచి తప్పించి సంజయ్ దత్ ఇండియాకు తీసుకొస్తాడు. మోసం చేసి దీనికి కారణమైన వాడి అంతు చూడటమే గుంరాలో మెయిన్ పాయింట్.

ఇక జిగ్రా విషయానికి వస్తే ఇక్కడ అక్కా తమ్ముడిని తీసుకున్నారు. ఫారిన్ లో అన్యాయంగా కేసులో ఇరుకున్న తమ్ముడి కోసం రక్తం పంచుకుని పుట్టిన సోదరి ఎంత దూరమైనా వెళ్లే కథతో వాసన్ జిగ్రా రాసుకున్నారు.

ట్రీట్ మెంట్, స్క్రీన్ ప్లే, బ్యాక్ డ్రాప్ వేరుగా ఉండొచ్చు కానీ సారూప్యతని మాత్రం కొట్టి పారేయలేం. తండ్రి తీసిన బ్లాక్ బస్టర్ ని ఇన్స్ పిరేషన్ గా తీసుకుని ఒక స్టోరీ రాస్తే అందులో మూడు దశాబ్దాల తర్వాత కూతురు నటించడం అనూహ్యమే.

ట్విస్ట్ ఏంటంటే గుంరా నిర్మించిన ధర్మా ప్రొడక్షన్స్ సంస్థే ఇప్పుడు జిగ్రాలో నిర్మాణ భాగస్వామిగా ఉండటం. సో తెలిసే ప్లానింగ్ జరిగి ఉండొచ్చు. హైదరాబాద్ తో సహా పలు నగరాల్లో ఈ యాక్షన్ థ్రిల్లర్ కోసం విస్తృతంగా ప్రమోషన్లు చేశారు. ప్రత్యేకంగా జూనియర్ ఎన్టీఆర్ తో కలిసి జిగ్రా విత్ దేవర అనే ఇంటర్వ్యూ కూడా తీశారు. జిగ్రా కోసం అలియా చాలా కష్టపడింది.