తమన్నాను భయపెట్టిన ‘కావాలయ్యా’

జైలర్ సినిమాలో తమన్నా చేసిన ‘కావాలయ్యా’ పాట చాలా స్పెషల్. ఆ సినిమాకు రిలీజ్ ముంగిట మంచి హైప్ తేవడంలో ఆ పాట కీలక పాత్ర పోషించింది. రిలీజ్ తర్వాత థియేటర్లలో కూడా ఆ పాటకు మంచి రెస్పాన్స్ వచ్చింది. ‘జైలర్’ విడుదలకు ముందు, తర్వాత కొన్ని నెలల పాటు రీల్స్, షార్ట్స్‌లో ఎక్కడ చూసినా ఆ పాటే తిరిగింది. కోట్ల మంది ఆ పాటకు స్టెప్పులేశారు. తమన్నా మంచి డ్యాన్సర్ అని కొత్తగా చెప్పాల్సిన పని లేదు కానీ.. ఈ పాటకు ఆమె వేసిన స్టెప్పులు వేరే లెవెల్ అని చెప్పాలి.

ఐతే ఈ పాట మరీ అంత పెద్ద హిట్టయ్యేసరికి తమన్నాకు భయం పట్టుకుందట. మరో సినిమాకు ఐటెం సాంగ్ అడిగితే.. నేను చెయ్యను అనే స్థాయిలో ‘కావాలయ్యా’ సాంగ్ తమన్నాను భయపెట్టేసిందట. కానీ దర్శకుడు తనకు నచ్చజెప్పి ‘స్త్రీ-2’లో స్పెషల్ సాంగ్ చేయించినట్లు తమన్నా వెల్లడించింది.

“జైలర్‌లో నా పాటకు వచ్చిన రెస్పాన్స్ చూసి షాకయ్యా. ఆ సాంగ్ అంత పెద్ద హిట్టవడం నా మీద ఒత్తిడి పెంచింది. మళ్లీ ఇలాంటి పాట చేస్తే అంత పెద్ద హిట్టవుతుందో లేదో.. అంచనాలను అందుకోలేకపోతే ఇబ్బంది కదా అనే భయం పట్టుకుంది నన్ను. అందుకే ‘స్త్రీ-2’లో స్పెషల్ సాంగ్ కోసం టీం నన్ను సంప్రదించగానే చేయనని చెప్పేశా. ఆ పాట అంచనాలను అందుకోలేకపోతే సినిమాకే రిస్క్ అని చెప్పా. కానీ దర్శకుడు నాకు సర్ది చెప్పాడు. ఈ పాట కూడా పెద్ద హిట్టవుతుందని కాన్ఫిడెన్స్ ఇచ్చాడు. ఆయన నమ్మకం చూసి ‘ఆజ్ కీ రాత్’ పాట చేశా. అది కూడా పెద్ద హిట్టయింది” అని తమన్నా ఓ ఇంటర్వ్యూలో చెప్పింది.

‘ఆజ్ కీ రాత్’ ట్యూన్ పరంగా ‘కావాలయ్యా’ రేంజిలో ఉండదు కానీ.. తమన్నా మాత్రం ఈ పాటలోనూ సూపర్ సెక్సీగా కనిపించడంతో పాటు అదిరిపోయే స్టెప్పులు వేసి అది పెద్ద హిట్ కావడంలో కీలక పాత్ర పోషించింది. ఈ పాటకు సోషల్ మీడియాలో 200 మిలియన్ వ్యూస్‌కు పైగానే రావడం విశేషం. ‘స్త్రీ-2’కు కూడా ఈ పాట పెద్ద ప్లస్ అయి రూ.500 కోట్ల వసూళ్ల మార్కును అందుకుంటోంది.