కల్ట్ టైటిల్‌తో రాజశేఖర్

టాలీవుడ్లో ఒకప్పుడు వైభవం చూసిన కథానాయకుల్లో రాజశేఖర్ ఒకరు. 80, 90 దశకంలో ఆయన అగ్ర కథానాయకులకు దీటుగా హిట్లు అందుకున్నాడు. కానీ ఆ తర్వాత నెమ్మదిగా ఆయన ప్రభావం తగ్గుతూ వచ్చింది. గత దశాబ్ద కాలంలో రాజశేఖర్‌కు చెప్పుకోదగ్గ హిట్ అంటే.. ‘గరుడవేగ’ మాత్రమే. చాలా ఏళ్ల తర్వాత ఆ చిత్రంతో ఓ మంచి విజయం సాధించాడు కానీ.. తర్వాత దాన్ని నిలబెట్టుకోలేకపోయాడు.

కల్కి, శేఖర్ సినిమాలు తీవ్ర నిరాశకు గురి చేయడంతో ఆయన కెరీర్లో మళ్లీ గ్యాప్ వచ్చింది. గత ఏడాది ‘ఎక్స్‌ట్రార్డినరీ మ్యాన్’ చిత్రంలో ప్రత్యేక పాత్రతో రీఎంట్రీ ఇచ్చాడు కానీ.. అది కూడా డిజాస్టర్ కావడంతో ఏం ప్రయోజనం లేకపోయింది. మళ్లీ విరామం తీసుకున్న రాజశేఖర్.. హీరోగా ఇటీవలే మరో సినిమాను లైన్లో పెట్టాడు. ఆ చిత్రానికి తన కల్ట్ సినిమాల్లో ఒకదాని టైటిల్ వాడుకుంటుండడం విశేషం.

90వ దశకంలో రాజశేఖర్ కెరీర్లో బిగ్గెస్ట్ హిట్లలో ఒకడిగా నిలిచిన చిత్రం.. మగాడు. ఇప్పుడు ఆ సినిమా టైటిల్‌ను రాజశేఖర్ తన కొత్త చిత్రానికి పెట్టుకుంటున్నాడట. ‘ప్రేమ ఇష్క్ కాదల్’ చిత్రంతో దర్శకుడిగా మెప్పించి.. ఆ తర్వాత అంచనాలను అందుకోలేకపోయిన యువ దర్శకుడు పవన్ సాధినేని ఈ చిత్రాన్ని రూపొందించాడు. చివరగా ఓటీటీ కోసం చేసిన ‘సేనాపతి’ చిత్రంతో పవన్ మెప్పించాడు.

దాని కంటే ముందు ఓ పెద్ద సినిమా చేయాలని ప్రయత్నించి ఫెయిలైన పవన్ సాధినేని.. ప్రస్తుతం రాజశేఖర్‌తో సినిమా చేస్తున్నాడు. దీని కథకు కూడా సూటయ్యేలా ‘మగాడు’ అనే టైటిల్ ఎంచుకున్నారట. ఈ టైటిల్ ప్రకారం చూస్తే ఇది బాగా హీరోయిజం ఉన్న మాస్ సినిమానే అయి ఉండొచ్చు. ఈ ఏడాది చివర్లో ఈ చిత్రం ప్రేక్షకుల ముందుకు వచ్చే అవకాశముంది.