సుందరం పొరపాటు – శనివారం దిద్దుబాటు

అంటే సుందరానికి అంచనాలు అందుకోవడంలో విఫలమవ్వడానికి అప్పట్లో ప్రధానంగా వినిపించిన కంప్లయింట్ నిడివి. ఒక కులాంతర ఎమోషనల్ ప్రేమకథకు మూడు గంటలకి దగ్గరగా నిడివిని పెట్టడం పట్ల ఎన్ని కామెంట్లు వచ్చినా దర్శకుడు వివేక్ ఆత్రేయ వెనక్కు తగ్గలేదు. మీడియా ప్రతినిధులు అడిగితే రాజీ పడే సమస్యే లేదన్నాడు. ఇప్పుడు ఇదే కాంబోలో సరిపోదా శనివారం వస్తోంది. ఆగస్ట్ 29 విడుదల కాబోతున్నఈ యాక్షన్ ఎంటర్ టైనర్ సైతం 2 గంటల 50 నిమిషాలతో సెన్సార్ వెర్షన్ లాక్ చేయడం అందరినీ ఆశ్చర్యానికి గురి చేస్తోంది.

దీనికి సంబంధించిన వెరైటీ ప్రోమో ఆకట్టుకుంటోంది. ఒకటి మాత్రం నిజం. లెన్త్ అనేది జానర్ తో ముడిపడిన విషయం. యానిమల్ 3 గంటల 21 నిముషాలు ఉన్నా ప్రేక్షకులు బ్రహ్మరథం పట్టారు. ఆర్ఆర్ఆర్, కల్కి, మహానటి, రంగస్థలం తదితర బ్లాక్ బస్టర్లన్నీ నిడివి పట్టించుకోకుండా జనం ఆదరించినవే. సో సరిపోదా శనివారంకు ఇదేమీ సమస్య కాబోదు. యూనిట్ చెబుతున్న టాక్ ప్రకారం సుందరంలో ఏదైతే పొరపాటు అనుకుంటున్నామో ఇప్పుడదే అడ్వాంటేజ్ అవుతుందని, అప్పుడే అయిపోయిందా అనే ఫీలింగ్ కలిగిస్తుందని అంటున్నారు.

ఇది కనక నిజమైతే అంతకంటే అభిమానులకు కావాల్సింది ఏముంటుంది. పోటీ లేకుండా సోలోగా బరిలో దిగుతున్న సరిపోదా శనివారం బాక్సాఫీస్ కు ఊపు ఇవ్వాలని బయ్యర్లతో పాటు సగటు మూవీ లవర్స్ కోరుకుంటున్నారు. ఈ నెలలో సక్సెస్ ఫుల్ మూవీస్ గా ఋజువు చేసుకున్న కమిటీ కుర్రోళ్ళు, ఆయ్ లు ఎంత విజయవంతమైనా మాస్ ఆకలిని తీర్చినవి కాదు. అందుకే ఇంద్ర రీ రిలీజ్ కు అంత బ్రహ్మాండమైన ఆదరణ దక్కింది. సో నానికి ఇది మంచి సమయం. సరిగ్గా కనెక్ట్ అయితే మాత్రం కనీసం రెండు వారాల పాటు నాన్ స్టాప్ కలెక్షన్లతో కుమ్మేయొచ్చు. ఇంకో ఆరు రోజులే మిగిలింది.