కొత్త సినిమాాలకు ‘మహేష్’ పంచ్

2024లో కొత్త సినిమాలకు ఏమంత కలిసి రావడం లేదు. ఈసారి సక్సెస్ రేట్ చాలా తక్కువగా ఉంది. సంక్రాంతికి వచ్చిన హనుమాన్.. వేసవిలో టిల్లు స్క్వేర్.. ఆ తర్వాత కల్కి మినహాయిస్తే పెద్ద విజయాలు సాధించిన సినిమాలు కనిపించవు. చిన్న సినిమాల పరిస్థితి అయితే దయనీయంగా ఉంది.

మినిమం ఇంపాక్ట్ చూపించకుండా థియేటర్ల నుంచి వెళ్లిపోతున్నాయి. వారం వారం పెద్ద సంఖ్యలోనే సినిమాలు రిలీజవుతున్నా.. వాటిలో ప్రభావం చూపుతున్నవి కనిపించడం లేదు. ‘కల్కి’ తర్వాత గత 40 రోజుల్లో ఒక్క సినిమాకూడా సరిగా ఆడలేదు. గత వారం అరడజను సినిమాలకు పైగా రిలీజైనా ఏదీ కలెక్షన్లు రాబట్టలేకపోయింది. ఈ వారం కూడా అరడజను సినిమాలకు పైగానే రిలీజవుతున్నాయి. వాటికి ఓ పాత సినిమా పెద్ద అడ్డంకిగా మారింది. అదే.. మురారి.

ఎప్పుడో 2001లో విడుదలైన చిత్రం.. మురారి. గత రెండేళ్లుగా పాత సినిమాలను రీ రిలీజ్ చేసి సెలబ్రేట్ చేసే ట్రెండు నడుస్తోంది. ఈ క్రమంలోనే ఈసారి మహేష్ బాబు పుట్టిన రోజు కానుకగా ‘మురారి’ని పెద్ద ఎత్తున రిలీజ్ చేస్తున్నారు. మధ్యలో రీ రిలీజ్ ట్రెండ్ కొంచెం డల్లయినట్లు కనిపించింది. కానీ ‘మురారి’కి మాత్రం బంపర్ క్రేజ్ వచ్చింది. రిలీజ్ ప్లానింగ్ కూడా బాగా చేశారు.

దీంతో విడుదలకు కొన్ని రోజుల ముందే ప్రి సేల్స్‌తోనే రూ.2 కోట్ల వసూళ్లతో కొత్త రికార్డును నెలకొల్పిందీ చిత్రం. ఈ సినిమాకు 9న ఉదయం పూట పెట్టిన షోలు పెట్టినట్లే సోల్డ్ ఔట్ అయిపోతున్నాయి. కొత్తగా ఏదో పెద్ద స్టార్ సినిమా వస్తున్నట్లుగా అర్లీ మార్నింగ్ షోలకు టికెట్లు బుక్ చేయడానికి జనం ఎగబడుతున్నారు. ఎన్నోసార్లు టీవీలో చూసిన పాత సినిమా ఇప్పుడు థియేటర్లలోకి వస్తుంటే జనం అంత ఆసక్తి చూపిస్తున్నారు కానీ.. ఈ వారం రిలీజయ్యే కొత్త సినిమాలను మాత్రం పట్టించుంటున్న పరిస్థితి కనిపించడం లేదు.

నిహారిక నిర్మాణంలో తెరకెక్కిన ‘కమిటీ కుర్రాళ్లు’ సహా చాలా చిన్న సినిమాలు రిలీజవుతున్నా వాటి మీద ఎవరి దృష్టీ నిలవడం లేదు. చూస్తుంటే ‘మురారి’ వాటన్నింటికీ గట్టి పంచే ఇచ్చేలా ఉంది. ఆ చిన్న సినిమాలన్నీ సాధించే వసూళ్ల కంటే ‘మురారి’కే ఎక్కువ కలెక్షన్లు రాబోతున్నాయన్నది స్పష్టం.