పొలిశెట్టి సెన్సాఫ్ హ్యూమర్ సూపరెహే..

కొందరు నటులు తెర మీద ఫన్నీ క్యారెక్టర్లు వేయడమే కాదు.. బయట కూడా అంతే సరదాగా కనిపిస్తారు. మాట్లాడతారు. యువ కథానాయకుడు నవీన్ పొలిశెట్టి ఈ కోవకే చెందుతాడు. అతను తన సినిమాలను ప్రమోట్ చేసే తీరు చాలా ఫన్నీగా ఉంటుంది. ఏదైనా సినిమా వేడుకలకు హాజరైనా తన సందడే వేరుగా ఉంటుంది.

ఐతే ఇప్పుడు నవీన్ ఏ సినిమా చేయట్లేదు. ఏ వేడుకలోనూ పాల్గొనే స్థితిలో కూడా లేడు. ‘మిస్ శెట్టి మిస్టర్ పొలిశెట్టి’ రిలీజ్ తర్వాత అతను ఓ ప్రమాదంలో గాయపడి కొన్ని నెలలుగా ఇంటికే పరిమితం అయ్యాడు. ఇటీవలే చేతికి కట్టుతో ఉన్న ఫొటో పెట్టి ప్రస్తుతం తాను రెస్ట్‌లో ఉన్నానని.. కోలుకోవడానికి టైం పడుతుందని.. కొత్త సినిమాల చర్చలు జరుగుతున్నాయని.. వాటి గురించి త్వరలో తెలియజేస్తానని చెప్పిన సంగతి తెలిసిందే.

తాజాగా నవీన్ తన హెల్త్ అప్‌డేట్ మీద ఒక ఫన్నీ వీడియో చేశాడు. అందులో తన గాయం మీద తనే పంచులు వేసుకున్నాడు. ఎనీ సెంటర్ సింగిల్ హ్యాండ్ గణేష్ అనే వెంకీ డైలాగ్ ఉన్న ‘గణేష్’.. చెయ్ చూశావా ఎంత రఫ్‌గా ఉందో అంటూ చిరు డైలాగ్ పేల్చే ‘గ్యాంగ్ లీడర్’ లాంటి సినిమాల్లో సన్నివేశాలు చూస్తూ తన చేయి విషయంలో ఫ్రస్టేట్ అయ్యేలా ఈ వీడియో రూపొందించారు.

చివరికి చేత్తో అన్నం తినలేక ఇబ్బందిపడే సరదా దృశ్యం కూడా ఇందులో పెట్టారు. అన్నీ చూపించి హాస్యం లేకుంటే జీవితం లేదని.. తాను ప్రస్తుతం బాగానే కోలుకుంటున్నానని.. త్వరలోనే కొత్త సినిమాల కబుర్లు చెబుతానని తనదైన శైలిలో హెల్త్ అప్‌డేట్ ఇచ్చాడు నవీన్. ప్రస్తుతం నవీన్ రెండు కొత్త చిత్రాలు అంగీకరించాడని.. కొత్త ఏడాదిలో వాటి షూట్ మొదలవుతుందని సమాచారం.