జులైలో హాహాకారాలు.. ఆగస్టు మీదే ఆశలు

కొత్త ఏడాదిలో సినిమాలకు అంతగా కలిసి రావడం లేదనే చెప్పాలి. సక్సెస్ రేట్ బాగా పడిపోయింది. సగటున నెలకో పెద్ద హిట్ కూడా పడలేదు. సంక్రాంతికి హనుమాన్, వేసవికి టిల్లు స్క్వేర్, ఆ తర్వాత కల్కి తప్ప పెద్ద హిట్లు లేవు. ఇలా ఓ పెద్ద సక్సెస్ రాగానే బాక్సాఫీస్ కాస్త ఊపిరి పీల్చుకుంటోంది కానీ.. ఆ వెంటనే స్లంప్ మొదలవుతోంది. డ్రై పీరియడ్ థియేటర్లకు చుక్కలు చూపిస్తోంది.

‘కల్కి’ రిలీజ్ తర్వాత నెల రోజుల పాటు ఓ మోస్తరు సక్సెస్ అయిన సినిమా కూడా ఏదీ లేదు. ‘ఇండియన్-2’ దారుణమైన డిజజాస్టర్‌గా మిగలగా.. మిగతా చిత్రాల గురించి చెప్పుకోవడానికి ఏమీ లేదు. డార్లింగ్, రాయన్ సినిమాలు పెద్దగా ప్రభావం చూపలేకపోయాయి. మొత్తంగా జులై నెల బాక్సాఫీస్‌లో హాహాకారాలే చూశాం. ఇప్పుడిక ఆగస్టు మీదికి ఫోకస్ మళ్లింది. ఈ నెల ఆశాజనకంగా కనిపిస్తోంది.

ఇండిపెండెన్స్ డే వీకెండ్లో రానున్న తెలుగు చిత్రాలు డబుల్ ఇస్మార్ట్, మిస్టర్ బచ్చన్‌లతో పాటు తమిళ అనువాదం ‘తంగలాన్’ కూడా ఆసక్తి రేకెత్తిస్తోంది. ఈ మూడు బాక్సాఫీస్‌ను కళకళలాడిస్తాయని ఆశిస్తున్నారు. ఇక నెలాఖర్లో రానున్న నాని సినిమా ‘సరిపోదా శనివారం’ను ఈ నెలలో రానున్న క్రేజీయెస్ట్ మూవీగా చెప్పొచ్చు. దానికి ముందు వారం, ఇప్పుడు తొలి రెండు వారాల్లో కొన్ని చిన్న సినిమాలు వస్తున్నాయి.

ఈ వారం శివం భజే, బడ్డీ, తిరగబడరా సామీ‌తో పాటు చాలా సినిమాలే రిలీజవుతున్నాయి. ఈ మూడు చిత్రాలే కొంచెం చెప్పుకోదగ్గవి. ‘బడ్డీ’ మూవీ టికెట్ల ధరలు కూడా తగ్గించుకుని థియేటర్లలోకి దిగుతోంది. ఆ చిత్రానికి ఓపెనింగ్స్ బెటర్‌గా ఉండొచ్చు. టాక్‌ను బట్టి సినిమా ఫలితం తేలుతుంది. మిగతా రెండు చిత్రాలకు పెద్దగా బజ్ లేదు. వీటికి కూడా టాక్ చాలా కీలకం కానుంది.