త్రిశంకు స్వర్గంలో తండేల్ తేదీ

ఎవరో జ్వాలలు రగిలించారు, దానికి వేరెవరో ఇబ్బంది పడ్డారని తండేల్ పరిస్థితి అచ్చం ఇలాగే ఉంది. అధికారికంగా డిసెంబర్ 20 విడుదల తేదీని ఎప్పుడో ప్రకటించుకున్న గీతా ఆర్ట్స్ 2 ఇప్పుడు దానికి కట్టుబడలేని ఇరకాటంలో పడింది. గేమ్ ఛేంజర్ క్రిస్మస్ కానుకగా వస్తుందని దిల్ రాజు చెప్పాక ఒక్కసారిగా ఆ నెల తాలూకు సమీకరణాలు పూర్తిగా మారిపోయాయి. ఒకవేళ పుష్ప 2 ది రూల్ కనక మాట తప్పకుండా డిసెంబర్ 6నే వస్తే మిగిలిన వాటికి స్కోప్ ఉండదు. బన్నీ తర్వాత రెండు వారాల గ్యాప్ తో రామ్ చరణ్ దిగుతాడు కాబట్టి రెండు ప్యాన్ ఇండియా మూవీస్ మధ్య నలిగిపోవాలని ఎవరూ కోరుకోరు.

అదే జరిగితే తండేల్ కున్న ఆప్షన్లు రెండు. ఒకటి నవంబర్ కు మార్చుకోవడం. కానీ పెద్ద బడ్జెట్ సినిమాలకు అదంత సేఫ్ సీజన్ కాదు. అక్టోబర్ టైట్ గా ఉంది. ఒకవేళ సంక్రాంతికి వెళదామా అంటే అక్కడేమో ముందు చిరంజీవి విశ్వంభర ఉంది. ఆయన బొమ్మ పెట్టుకుని తండేల్ నిర్మాత అల్లు అరవింద్ ఎదురెళ్ళే రిస్క్ తీసుకోరు. అలా చేస్తే సోషల్ మీడియా ఫ్యాన్స్ తో లేనిపోని నెగటివిటీ వస్తుంది. ఇది కాకుండా రవితేజ – భాను భోగవరపు, వెంకటేష్ – అనిల్ రావిపూడి సినిమాలు ఆల్రెడీ కర్చీఫ్ వేసుకుని ఉన్నాయి. బాలయ్య 109 కూడా పండగ వైపే చూస్తోందట. దర్శకుడు బాబీ ప్లానింగ్ ని బట్టి తేదీ నిర్ణయించబోతున్నారు.

ఇంత సంకటం మధ్య తండేల్ షూటింగ్ అయితే ముందు అనుకున్న ప్లానింగ్ ప్రకారం జరిగిపోతోంది. చందూ మొండేటి దర్శకత్వంలో రూపొందిన ఈ చిత్రంలో నాగచైతన్య, సాయిపల్లవి జంట మీద భారీ అంచనాలున్నాయి. దేవిశ్రీప్రసాద్ సంగీతం మరో ఆకర్షణ. పాకిస్థాన్ లో సగభాగం జరిగే ఈ కథలో చాలా సర్ప్రైజింగ్ ఎలిమెంట్స్ ని పొందుపరిచారు. వరస డిజాస్టర్లతో సతమతమైన చైతు ఈసారి గురి తప్పకూడదనే ఉద్దేశంతో తండేల్ ప్రీ ప్రొడక్షన్ పనుల్లో స్వయంగా పాల్గొన్నాడు. నెలల తరబడి దానికోసమే కేటాయించాడు. చివరికి తండేల్ రిలీజ్ డేట్ కథ ఏ కంచికి చేరుతుందో ఇంకా వేచి చూడాలి.