థియేటర్లలో ఫ్లాప్.. ఓటీటీలో సూపర్ హిట్

కొన్ని సినిమాలు థియేటర్లలో ఉండగా జనం పెద్దగా పట్టించుకోరు. అవి ఏదో మొక్కుబడిగా ఆడేసి వెళ్లిపోతుంటాయి. కానీ అవే చిత్రాలను ఓటీటీలో బాగా ఆదరిస్తారు. మంచి సినిమానే కదా.. ఎందుకు ఆడలేదు అని ఆశ్చర్యపోతారు. ఈ కోవలో చాలా చిత్రాలే ఉన్నాయి. ఇప్పుడు సుధీర్ బాబు చిత్రం ‘హరోంహర’ విషయంలోనూ ఇదే జరుగుతోంది.

గత నెలలో ఈ చిత్రం థియేటర్లలో విడుదలైనపుడు జనం లైట్ తీసుకున్నారు. డబ్బింగ్ మూవీ అయిన మహారాజకే పట్టం కట్టారు. దాని జోరు ముందు సుధీర్ మూవీ నిలవలేకపోయింది. కొంతమేర ఓపెనింగ్స్ వచ్చాయి కానీ.. అంతిమంగా ఆశించిన ఫలితం రాలేదు. తొలి వీకెండ్ తర్వాత హరోంహర గురించి డిస్కషనే లేదు. ఐతే ఇటీవలే హరోంహర అమేజాన్ ప్రైమ్ ద్వారా డిజిటల్‌గా రిలీజైంది.

ఇలా విడుదలైన దగ్గర్నుంచి ‘హరోంహరకు రెస్పాన్స్ అదిరిపోతోంది. మినీ కేజీఎఫ్ తరహాలో అనిపించిన ఈ చిత్రాన్ని ప్రేక్షకులు బాగా చూస్తున్నారు. రోజు రోజుకూ ఆదరణ పెంచుకుంటున్న ఈ చిత్రం ఇప్పుడు ఇండియా లెవెల్లో టాప్‌లో ట్రెండ్ అవుతున్నట్లు అమేజాన్ ప్రైమ్ ప్రకటించింది.

అక్కడ పెద్ద పెద్ద సినిమాలకు దీటుగా ఆదరణ తెచ్చుకుంటోంది హరోంహర. బహు భాషల ప్రేక్షకులు ఈ సినిమా చూస్తున్నారు. సోషల్ మీడియాలో ఈ సినిమాలో సన్నివేశాల గురించి చర్చ జరుగుతోంది.

ముఖ్యంగా యాక్షన్ సీక్వెన్సులు.. సినిమాలో చూపించిన గన్ కల్చర్ మీద చర్చ జరుగుతోంది. దర్శకుడు జ్ఞానశేఖర్ ప్రతిభను.. అలాగే సుధీర్ బాబు నటనను అందరూ కొనియాడుతున్నారు. సినిమాను సరిగా ప్రమోట్ చేసి ఉంటే థియేటర్లలో కూడా బాగా ఆడేదనే అభిప్రాయాలు వ్యక్తమవుతున్నాయి.