శంకర్‌పై కోపం కాదు.. బాధ

తమిళ లెజెండరీ డైరెక్టర్ శంకర్ అంటే తెలుగు ప్రేక్షకులకు సైతం ఎంత ప్రేమో కొత్తగా చెప్పాల్సిన పని లేదు. ‘జెంటిల్‌మన్’ మొదలుకుని ‘2.0’ వరకు ఆయన సినిమాలు తమిళంలో ఎంత విజయం సాధించాయో తెలుగులో కూడా అంతే సక్సెస్ అయ్యాయి. తెలుగు ప్రేక్షకుల నుంచి అత్యంత ఆదరణ పొందిన తమిళ దర్శకుడు ఆయనే అంటే ఆశ్చర్యమేమీ లేదు. అలాంటి దర్శకుడి నుంచి ‘భారతీయుడు-2’ లాంటి సినిమా రావడం ప్రేక్షకులకు అస్సలు రుచించడం లేదు. ఏ శంకర్ సినిమాకూ రానంత వ్యతిరేకతను ఈ చిత్రం మూటగట్టుకుంది.

పేరుకు ఇది తమిళ సినిమానే కానీ.. అక్కడికంటే తెలుగులోనే దీనికి జోరుగా అడ్వాన్స్ బుకింగ్స్ జరిగాయి. ఓపెనింగ్స్ కూడా తమిళం కంటే ఎక్కువ వచ్చాయన్నది ట్రేడ్ పండిట్ల అంచనా. దీన్ని బట్టి శంకర్ మీద మన వాళ్లకు ఉన్న అభిమానం ఎలాంటిదో అర్థం చేసుకోవచ్చు. అంత నమ్మిన దర్శకుడు తన స్థాయికి ఏమాత్రం తగని సినిమా తీయడంతో ప్రేక్షకులు అసహనానికి గురవుతున్నారు.

ఐతే ‘భారతీయుడు-2’ సినిమాను విమర్శకులతో పాటు ప్రేక్షకులు విమర్శిస్తున్నారన్నా.. ట్రోల్ చేస్తున్నారన్నా అది శంకర్ మీద ఉన్న కోపం అనుకోవడానికి లేదు. దాన్ని కోపం కంటే బాధగా భావించాలి. ఎలాంటి దర్శకుడు ఎలా అయిపోయాడు అనే బాధ నుంచే విమర్శలు పుట్టుకొస్తున్నాయి.

శంకర్ తొలి చిత్రం ‘జెంటిల్‌మన్’కే మనవాళ్లు బ్రహ్మరథం పట్టారు. ఆ తర్వాత ప్రేమికుడు, భారతీయుడు, జీన్స్, ఒకే ఒక్కడు, అపరిచితుడు, శివాజీ, రోబో.. ఇలా ప్రతి సినిమానూ మన వాళ్లు నెత్తిన పెట్టుకున్నారు. ‘బాయ్స్’ లాంటి శంకర్ స్థాయికి తగని సినిమాను కూడా తమిళుల కంటే తెలుగు వాళ్లు బాగా ఆదరించారు. డివైడ్ టాక్ తెచ్చుకున్న ‘2.0’కు కూడా భారీ ఓపెనింగ్స్ ఇచ్చారు. తమను ఆయా సినిమాలతో శంకర్ ఎంతగా అలరించాడో తెలుగు ప్రేక్షకులు అంత సులువుగా మరిచిపోలేరు. అత్యున్నత స్థాయి సినిమాలతో ప్రేక్షకుల స్థాయిని కూడా పెంచిన దర్శకుడు శంకర్. అలాంటి మేటి దర్శకుడు ‘భారతీయుడు-2’ లాంటి కంటెంట్ లేని సినిమా ఇచ్చేసరికి ప్రేక్షకులు జీర్ణించుకోలేక తమ అభిమాన దర్శకుడు ఇలా ప్రమాణాలు తగ్గించుకోవడం మీద బాధతో స్పందిస్తున్నారు.