టైటానిక్, అవతార్ బ్యాక్‌బోన్ ఇక లేరు

టైటానిక్, అవతార్ సినిమాలు ప్రపంచవ్యాప్తంగా ఎంతటి సంచలన విజయం సాధించాయో కొత్తగా చెప్పాల్సిన పని లేదు. ప్రపంచ సినిమా గతిని మార్చిన చిత్రాలుగా వీటిని చెప్పొచ్చు. ఆయా సమయాల్లో ప్రపంచ సినిమా రికార్డులన్నింటినీ చెరిపేసిన ఈ చిత్రాలను గుర్తు చేసుకోగానే అందరికీ జేమ్స్ కామెరూనే గుర్తుకు వస్తారు.

ఐతే దర్శకుడిగా ఇంత భారీ కలలు కని అద్భుతంగా తెర మీద ఆవిష్కరించిన కామెరూన్‌‌కు తెర వెనుక ఉండి అన్నీ సమకూర్చి పెట్టిన వ్యక్తి జాన్ లాండౌ. ప్రముఖ నిర్మాణ సంస్థ పారమౌంట్ పిక్చర్స్ వ్యవస్థాపకుడే జాన్ లాండౌ. టైటానిక్, అవతార్ సహా ఎన్నో అద్భుత చిత్రాలను నిర్మించిన ఆ లెజెండరీ ప్రొడ్యూసర్ ఇక లేరు. 64 ఏళ్ల జాన్ లాండౌ మరణించిన విషయాన్ని ఆయన తనయుడు బుధవారం ప్రకటించాడు.

1960లో జన్మించిన తల్లిదండ్రులు కూడా సినీ నిర్మాతలే. అమెరికన్ ఫిలిం థియేటర్ అనే సంస్థను నెలకొల్పి ఎన్నో సినిమాలు నిర్మించారు. వారి వారసత్వాన్ని కొనసాగిస్తూ జాన్ లాండౌ పారామౌంట్ పిక్చర్స్ సంస్థను ఏర్పాటు చేసి సినిమాల నిర్మాణం సాగించారు. ఐతే అంతకుముందు, తర్వాత కూడా ఎన్నో చిత్రాలను నిర్మించినప్పటికీ టైటానిక్, అవతార్ చిత్రాలతో జాన్ లాండౌకు వచ్చిన పేరు అంతా ఇంతా కాదు. ఈ చిత్రాల్లో జేమ్స్ కామెరూన్ కూడా నిర్మాణ భాగస్వామే కానీ… ప్రధానంగా నిధులు సమకూర్చింది జాన్ లాండౌనే. ఆయా సమయాల్లో వేరే నిర్మాతలు ఊహించడానికి కూడా భయపడేంత భారీ బడ్జెట్లలో ఈ సినిమాలను ప్రొడ్యూస్ చేసి అందుకు తగ్గట్లు భారీ లాభాలను అందుకోవడమే కాక.. ఎన్నో అవార్డులు కూడా సొంతం చేసుకున్నాడు జాన్ లాండౌ.