ఇండియన్ 2… అందరికీ అగ్ని పరిక్షే..

ఇండియన్ 2 సినిమా బజ్ ప్రస్తుతం ఎలా ఉందో ప్రత్యేకంగా చెప్పనక్కర్లేదు. ఎనౌన్స్ చేసినప్పుడు క్రియేట్ చేసిన హైప్ మెల్లమెల్లగా తగ్గుతూ వస్తోంది. ఏదో ఒక అప్డేట్ ఇస్తున్నా కూడా ఇప్పటివరకు సరైన అంచనాలు క్రియేట్ కాలేదు. హిట్ సినిమాకు సీక్వెల్, శంకర్ – కమల్ హాసన్ కాంబో.. అనిరుధ్ మ్యూజిక్ – లైకా వారి భారీ ప్రొడక్షన్ వాల్యూస్ ఇలా అన్ని విషయాల్లో భారీ అంచనాలు క్రియేట్ చేయాల్సిన ఇండియన్ 2 మినిమమ్ సౌండ్ చేయడం లేదు.

ఫైనల్ గా సినిమా కంటెంట్ పైనే ఫలితం ఆధారపడి ఉందని అర్ధమవుతుంది. ఇక దాదాపు ఈ సినిమాకు వర్క్ చేస్తున్న అందరికి కూడా ఇది ఒక అగ్ని పరీక్ష లాంటిదే అని చెప్పవచ్చు. ముఖ్యంగా శంకర్ రోబో తరువాత చేసిన సినిమాలన్నీ కూడా అంతగా క్లిక్ కాలేదు. స్నేహితుడు, ఐ, 2.ఓ అంచనాలను అందుకోలేకపోయాయి. ఇక ఇండియన్ 2 స్టార్ట్ అయిన మొదట్లోనే ఓ ప్రమాదం జరగడం, ఆ తరువాత లైకా ప్రొడ్యూసర్స్ తో విబేధాలు రావడం సినిమాకు చాలా గ్యాప్ తీసుకొచ్చాయి.

ఇండియన్ 2 కారణంగా గేమ్ ఛేంజర్ కూడా ఇబ్బందులు ఎదుర్కోవాల్సి వచ్చింది. రెండు సినిమాలపై మినిమం బజ్ అయితే లేదు. ఇక ఆయనకు ఇండియన్ 2 సినిమా హిట్టవ్వడం చాలా అవసరం. అలాగే మరోవైపు కమల్ హాసన్ మళ్ళీ బౌన్స్ బ్యాక్ అవ్వాల్సిన అవసరం ఉంది. విక్రమ్ తో ఆయన పర్ఫెక్ట్ అందుకున్నప్పటికి అందులో లోకేష్ పనితనం, మిగతా రోల్స్ సినిమా విజయంలో గట్టిగానే హెల్ప్ చేశాయి. ఇక ఇప్పుడు అంతకంటే బిగ్ సినిమా ఇండియన్ 2, 250 కోట్లు ఖర్చుతో వస్తోంది. కాబట్టి హీరోగా తన స్టార్ ఇమేజ్ ను మరో సారి నిరూపించుకునే సమయం ఆసన్నమైంది.

ఇక మరోవైపు నిర్మాణ సంస్థ లైకా వారికి కూడా ఈ సినిమా మంచి లాభాలు అందించాల్సిన అవసరం ఉంది. గత ఐదేళ్లలో ఈ సంస్థ పెద్ద సినిమాలనే నిర్మించింది. పోన్నీయిన్ సెల్వన్ , దర్బార్, లాల్ సలామ్, మాఫియా, రామ్ సేతు, చంద్రముఖి లాంటి భారీ బడ్జెట్ సినిమాలపై గట్టిగానే పెట్టుబడులు పెట్టింది. కానీ ఏది కూడా అంతగా లాభాలు తీసుకు రాలేదు. ఇక ఇండియన్ 2 తో కాస్త ఆర్థికంగా లాభ పడాల్సిన అవసరం ఉంది. ఇక సినిమాలో నటించే సిద్ధార్ట్, రకుల్ ప్రీత్ సింగ్ లాంటి వాళ్ళకు చాలా.కాలంగా హిట్స్ లేవు. కాబట్టి ఇండియన్ 2 రిజల్ట్ తో వారి లక్కు మారుతుందేమో చూడాలి.