గేమ్ చేంజ‌ర్‌కు ఇబ్బంది రావొద్ద‌ని..

ఆగ‌స్టు 15 అంటే ఎంతో ఆక‌ర్ష‌ణీయ‌మైన డేట్. ప్ర‌తి ఏడాది ఆ వీకెండ్లో భారీ చిత్రాలు రిలీజ‌వుతుంటాయి. ఈసారి పుష్ప‌-2 లాంటి క్రేజీ మూవీ ఆ తేదీకి షెడ్యూల్ కావ‌డంతో భార‌తీయ సినీ ప్రియులు ఎంతో ఎగ్జైట్ అయ్యారు. పాన్ ఇండియా స్థాయిలో ఆ చిత్రానికి బంప‌ర్ క్రేజ్ ఉండ‌డంతో ఇండిపెండెన్స్ డే వీకెండ్లో వ‌సూళ్ల మోత మోగిపోతుంద‌ని భావించారు. కానీ పుష్ప‌-2 అనూహ్యంగా ఆ డేట్ నుంచి త‌ప్పుకుని డిసెంబ‌రుకు వెళ్లిపోయింది.

మ‌రి ఆగ‌స్టు 15ను ఏ భారీ చిత్రం క్యాష్ చేసుకోవ‌డానికి చూస్తుందా అని అంద‌రూ ఆస‌క్తిగా ఎదురు చూడ‌గా.. ఇప్ప‌టిదాకా అయితే ఏ పెద్ద సినిమా ఆ డేట్‌ను వాడుకునే ప్ర‌య‌త్నం చేయ‌లేదు. తెలుగు నుంచి రామ్ మూవీ డ‌బుల్ ఇస్మార్ట్ మాత్ర‌మే ఆగ‌స్టు 15కు షెడ్యూల్ అయింది.

ఐతే పాన్ ఇండియా స్థాయిలో రిలీజ్ కావాల్సిన భార‌తీయుడు-2కు ఆగ‌స్టు 15 డేట్ తీసుకుంటే బాగా క‌లిసి వ‌స్తుంద‌నే అభిప్రాయాలు వ్య‌క్త‌మ‌య్యాయి. ఇండియ‌న్-2 టీం కూడా ఆ దిశ‌గా ఆలోచిస్తున్న‌ట్లు వార్త‌లు వ‌చ్చాయి. కానీ అన్నీ ప‌రిశీలించాక ఇండియ‌న్-2 టీం ఆగ‌స్టు 15 రిలీజ్ విష‌యంలో వెన‌క్కి త‌గ్గింది. ఇంత‌కుముందు ప్ర‌క‌టించిన‌ట్లే జులై 12న ఈ చిత్రాన్ని రిలీజ్ చేయ‌బోతున్నారు. ఇందుకోసం ఈ నెల 21న యుఎస్ ప్రిమియ‌ర్ బుకింగ్స్ కూడా మొద‌లుపెట్టేస్తున్నారు. ఈ విష‌యాన్ని నిర్మాణ సంస్థ లైకా ప్రొడ‌క్ష‌న్స్ కూడా ధ్రువీక‌రించింది.

అంటే ఇండియ‌న్-2 మ‌రోసారి వాయిదా ప‌డ‌ట్లేద‌ని అర్థం. జూన్ 12కు అనుకున్న ఈ చిత్రాన్ని నెల రోజులు వాయిదా వేసిన సంగ‌తి తెలిసిందే. మ‌ళ్లీ ఇంకోసారి వాయిదా వేస్తే జ‌నాల్లో ఆస‌క్తి త‌గ్గిపోతుంద‌ని.. ఈ చిత్రం ఆల‌స్యం అయ్యే కొద్దీ గేమ్ చేంజ‌ర్ మీద కూడా ఆ ప్ర‌భావం ప‌డుతుంద‌ని భావించి అనుకున్న ప్ర‌కార‌మే జులై 12న భార‌తీయుడు-2ను రిలీజ్ చేస్తున్న‌ట్లు తెలుస్తోంది.