ఓటిటి ఆలస్యం చాలా మేలు చేసింది

మాములుగా ఏ భాష సినిమాలైనా థియేటర్ కు ఓటిటికి మహా అయితే రెండు నెలల కంటే ఎక్కువ గ్యాప్ ఉండటం చూడం. ఆర్ఆర్ఆర్ లాంటి బ్లాక్ బస్టర్, ఇమేజ్ లేని చిన్న హీరోలు నటించిన బడ్జెట్ మూవీ ఏదైనా సరే అందరూ ఇదే సూత్రం పాటిస్తున్నారు.

ఒకవేళ ఫ్లాప్ అయ్యే సూచనలు ముందే పసిగడితే కేవలం 21 రోజుల విండో పాటిస్తున్న అగ్ర నిర్మాతలు కళ్ళముందే ఉన్నారు. కానీ ఏడాదికి దగ్గరగా ఉన్న టైంలో ఒక చిత్రం డిజిటల్ కు రావడం విచిత్రమే. అదే జర హట్కే జర బచ్కే. విక్కీ కౌశల్, సారాఅలీ ఖాన్ జంటగా నటించిన ఈ ఫ్యామిలీ ఎంటర్టైనర్ గత ఏడాది జూన్ 2 ప్రేక్షకుల ముందుకొచ్చింది.

టాక్ యావరేజ్ నుంచి ఎబోవ్ యావరేజ్ మధ్యలో వచ్చినా వంద కోట్లకు పైగా వసూళ్లు సాధించి ట్రేడ్ ని ఆశ్యర్యపరిచింది. విశ్లేషకులు కంటెంట్ మీద రకరకాల కామెంట్లకు చేశారు. అయినా సరే జనం ఆదరించారు. కట్ చేస్తే థియేటర్లో మిస్ అయినవాళ్లు ఇంట్లో చూద్దామని ఓటిటి కోసం ఎదురు చూస్తుంటే ఎంతకీ రాలేదు.

తొలుత హక్కుల కొనుగోలు విషయంలో ఏదో జరిగిందని, దాని వల్లే ప్రొడ్యూసర్ అగ్రిమెంట్ చేసుకోలేదని టాక్ వచ్చింది. అలా అదిగో ఇదిగో అంటూ ఫైనల్ గా మే 17 జియో సినిమాలో ఈ మూవీ స్ట్రీమింగ్ కానుంది. ఒకరకంగా ఈ పరిణామం మేలే చేసింది.

ఇంత లేట్ అయ్యిందంటే అంతగా ఏముందనే ఆసక్తి ఆడియన్స్ లో పెరిగిపోయింది. ఆ స్పందన సోషల్ మీడియాలో కనిపిస్తోంది. ఒకవేళ నిన్న సంవత్సరమే త్వరగా వచ్చి ఉంటే దీనికి ఇంత ఓటిటి బజ్ వచ్చేది కాదనే కామెంట్స్ లో నిజం లేకపోలేదు. అలా అని ఇది అందరూ పాటించేది కాదు.

ఎందుకంటే ఓటిటిలకు వ్యూస్ పరంగా ఫీడింగ్ వచ్చేందుకు ప్రధాన కారణమే వీలైనంత త్వరగా డిజిటల్ రిలీజ్ పెట్టుకోవడం. అలాంటిది ఇలా నెలల తర్వాత అంటే రేటు విషయంలో భారీ కోత పెట్టేస్తారు. ఏదో జర హట్కే జర బచ్కే టైం బాగుంది కాబట్టి ఇలా గట్టెక్కిపోయింది.