ఎన్టీఆర్ పుట్టిన రోజుకు సర్ప్రైజ్

పెద్ద హీరోల పుట్టిన రోజులు, ఇంకేదైనా ప్రత్యేక సందర్భాలు వస్తే అభిమానులు వాళ్లు నటిస్తున్న కొత్త చిత్రాల నుంచి అప్‌డేట్స్ కోరుకోవడం సహజం. తెలుగు, తమిళంలో ఈ ఒరవడి ఎక్కువ. ఐతే బాలీవుడ్‌లో ఇలాంటివి పట్టించుకోరు.

అసలక్కడ అభిమానులు అప్‌డేట్స్ కోసం సోషల్ మీడియాలో గొడవ చేయడం.. చిత్ర బృందాలు క్రమం తప్పకుండా అప్‌డేట్స్ ఇవ్వడం లాంటివి తక్కువ. ఐతే టాలీవుడ్ స్టార్ వెళ్లి బాలీవుడ్‌లో సినిమా చేస్తే.. అప్పుడు ఇక్కడి అభిమానుల ఆకాంక్షలను పట్టించుకుంటారా అన్న సందేహాలుంటాయి.

జూనియర్ ఎన్టీఆర్ ఫ్యాన్స్‌ను మాత్రం ఈ విషయంలో బాలీవుడ్ ప్రొడక్షన్ హౌస్ నిరాశపరచట్లేదని సమాచారం. తారక్ ప్రస్తుతం తెలుగులో ‘దేవర’తో పాటు హిందీలో ‘వార్-2’లో నటిస్తున్న సంగతి తెలిసిందే.

మే 20న ఈ నందమూరి హీరో పుట్టిన రోజు కాగా.. ‘దేవర’ టీం నుంచి ఆల్రెడీ ఒక అప్‌డేట్ ఉంటుందని తెలుస్తోంది. దీంతో పాటుగా ‘వార్-2’ టీం కూడా అభిమానులను మురిపించడానికి సిద్ధమైందట. ఇప్పటికే తారక్ పాల్గొన్న షూట్ నుంచి ఒక మంచి యాక్షన్ టచ్ ఉన్న లుక్ తీసి జూనియర్ పుట్టిన రోజు ఫస్ట్ లుక్‌గా రిలీజ్ చేయబోతున్నారట. ఇది అభిమానులకు పెద్ద సర్ప్రైజ్ అనడంలో సందేహం లేదు. ఇక ‘దేవర’ టీం సినిమా నుంచి తొలి పాటను ఆ రోజే రిలీజ్ చేస్తుందని అంటున్నారు.

ఇంతకుమించి జూనియర్ పుట్టిన రోజుకు వేరే అప్‌డేట్స్ ఉండకపోవచ్చు. ప్రశాంత్ నీల్‌తో తారక్ చేయాల్సిన సినిమా నుంచి గత ఏడాదే ఒక లుక్ రిలీజ్ చేశారు. కానీ ఈ చిత్రం ఇప్పుడిప్పుడే పట్టాలెక్కే అవకాశం లేకపోవడంతో ఈ ఏడాది మళ్లీ దాన్నుంచి అప్‌డేట్‌ ఉండకపోవచ్చని తెలుస్తోంది.