వాయిదాలు చిన్న చిత్రాలకూ తప్పడం లేదు

రకరకాల కారణాల వల్ల వాయిదాలు కేవలం ప్యాన్ ఇండియా సినిమాలకే అనుకుంటాం కానీ చిన్న చిత్రాలకూ ఈ బెడద తప్పడం లేదు. ఈ వారం ఏప్రిల్ 19 విడుదల కావాల్సిన వాటిలో లవ్ మౌళి, శశివదనే పోస్ట్ పోన్ అయ్యాయి. బాక్సాఫీస్ బాగా డల్ గా ఉండటం, ఐపిఎల్ ఫీవర్ తో పాటు రాజకీయ వాతావరణం వల్ల జనాలు థియేటర్లకు వచ్చేందుకు అంతగా ఆసక్తి చూపించడం లేదు. స్టార్ క్యాస్టింగ్ ఉన్నా బొమ్మ తేడా కొడితే నిర్మొహమాటంగా తిరస్కారం తప్పదని ఫ్యామిలీ స్టార్ నిరూపించింది. కంటెంట్ ఉంటే మొహాలు తెలియకపోయినా టికెట్లు తెగేలా మలయాళం డబ్బింగ్ ప్రేమలు సక్సెసయ్యింది.

ఎందుకొచ్చిన గొడవలెమ్మని నిర్మాతలు అన్ని రకాలుగా అలోచించి నిర్ణయాలు తీసుకుంటున్నారు. నవదీప్ చాలా గ్యాప్ తర్వాత సోలో హీరోగా చేసిన మూవీ లవ్ మౌళి. టైటిల్ తో పాటు థీమ్ కూడా వెరైటీగానే ఉంది. నాలుగు నిమిషాల ట్రైలర్ వదిలి టీమ్ పెద్ద రిస్క్ చేసింది. అగ్రెసివ్ క్యారెక్టరైజేషన్ తో ఏదో డిఫరెంట్ గా ట్రై చేసిన ఫీలింగ్ అయితే కలిగింది. తెలిసిన క్యాస్టింగ్ లేకపోయినా శశివదనేకు మైత్రి లాంటి పెద్ద సంస్థ డిస్ట్రిబ్యూషన్ దొరికింది. దీంతో మంచి థియేటర్లు వస్తాయనుకుంటే సరిపడా బజ్ లేకపోవడంతో కొద్దిరోజులు ఆగాలని డిసైడయ్యారు. సో తప్పుకోక తప్పలేదు.

ఎండ తాకిడి కూడా ఈ పరిస్థితికి దారి తీసిందని చెప్పాలి. టిల్లు స్క్వేర్ ఒక్కటే ఈ ప్రతికూలతలన్నీ దాటి 125 కోట్ల గ్రాస్ ని తీసుకొచ్చి ఇంకా బలంగా ఉంది. ఈ శుక్రవారం పారిజాత పర్వంతో పాటు ఇంకొన్ని సినిమాలు అదృష్టాన్ని పరీక్షించుకోబోతున్నాయి. దేని మీద బజ్ లేకపోవడంతో ప్రమోషన్ల కోసం అన్ని రకాల అస్త్రాలను వాడుతున్నారు. చైతన్య రావు, వైవా హర్ష, శ్రద్ధ దాస్ తదితరులు నటించిన పారిజాత పర్వం మీద అంచనాలైతే లేవు కానీ ఖచ్చితంగా అలరిస్తుందనే నమ్మకాన్ని టీమ్ వ్యక్తం చేస్తోంది. నిస్సారంగా ఉన్న థియేటర్లకు కొత్తగా ఉత్సాహం తెచ్చేదెవరో చూడాలి.