ఫేక్ హడావిడికి దూరంగా దిల్ రాజు

సముద్రమంత నమ్మకం పెట్టుకుంటే చెరువంత ఫలితాన్ని ఇచ్చిన ది ఫ్యామిలీ స్టార్ ఫలితం నిర్మాత దిల్ రాజుని ఎంత మాత్రం సంతృప్తి పరచలేదన్నది వాస్తవం. కావాలని సోషల్ మీడియాలో నెగిటివ్ క్యాంపైన్ చేశారని సైబర్ కంప్లైంట్ ఇవ్వడం లాంటి చర్యలు కొందరు అభిమానులు చేశారు కానీ వాటి వల్ల కలెక్షన్లు పెంచలేరన్నది ఓపెన్ సీక్రెట్. వరసగా వస్తున్న సెలవులను టిల్లు స్క్వేర్, మంజుమ్మల్ బాయ్స్ వాడుకున్నంతగా ఫ్యామిలీ స్టార్ ఉపయోగించుకోలేదు. మధ్యతరగతి ప్రేక్షకులు విపరీతంగా ఇష్టపడే చాలా మంచి సినిమా తీశామని బలంగా చెప్పుకున్న దిల్ రాజుని ఒక్క విషయంలో మెచ్చుకోక తప్పదు.

ఇది కలెక్షన్లు గొప్పగా చెప్పుకునే హైప్ పెంచుకునే ట్రెండ్. రెండో రోజు నుంచే తమ సినిమాకు ఇన్నేసి కోట్లు వచ్చాయని పోస్టర్లలో పెద్ద పెద్ద నెంబర్లు వేసి పబ్లిసిటీ చేయడం గత కొన్నేళ్లుగా ఎన్నో చూస్తున్నాం. ఇమేజ్ ఉన్న హీరోల అసలు ఫిగర్లకు ఓ పాతిక శాతం దాకా ఫేక్ కలిపేసి తమది బ్లాక్ బస్టరని చాటింపేసుకునే ప్రొడ్యూసర్లకు కొదవ లేదు. ఇలా చేయడం కొంత సానుకూల ఫలితాలు ఇచ్చిన సందర్భాలు లేకపోలేదు. దిల్ రాజు మాత్రం వీటి జోలికి వెళ్ళలేదు. ఏప్రిల్ 5 రిలీజ్ రోజు నుంచి మొదలుపెడితే ఏ దశలోనూ వసూళ్లను హైలైట్ చేస్తూ పోస్టర్ కానీ ప్రమోషన్ కానీ చేయకపోవడం గమనార్హం.

దీని కన్నా దారుణంగా తిరస్కారానికి గురైన సినిమాలు ఎన్నో కనీసం వారం వరకు కలెక్షన్ల హడావిడితో ఎంతో కొంత జనాన్ని మభ్యపెట్టే బాపతులు ఇంకా పచ్చిగానే ఉన్నాయి. కానీ దిల్ రాజు మాత్రం పబ్లిక్ రియాక్షన్లు, థియేటర్ నుంచి బయటికొచ్చిన జనాల స్పందనలు మాత్రమే వీడియో రూపంలో ప్రమోట్ చేశారు కానీ ఇన్నేసి కోట్లు అన్నేసి కోట్లని ప్రచారంతో ఊదరగొట్టలేదు. ఇది ఒకరకంగా మంచిదే. సుమారు నలభై అయిదు కోట్ల బ్రేక్ ఈవెన్ టార్గెట్ తో బరిలో దిగిన ఫ్యామిలీ స్టార్ ఇంకా సగం దూరం పైనే ప్రయాణం చేయాల్సి ఉంది. రెండో వీకెండ్ మీద బోలెడు ఆశలు పెట్టుకుని ఎదురు చూస్తోంది