కొత్త విడుదల తేదీ వైపు కల్కి అడుగులు

ప్రభాస్ కల్కి 2898 ఏడి విడుదల తేదీలో మార్పు గురించి వైజయంతి నుంచి ఎలాంటి ప్రకటన రావడం లేదు. ప్రస్తుతానికి మే 9 ప్రకారమే బ్యాలన్స్ షూటింగ్ తో పాటు ఇతర పోస్ట్ ప్రొడక్షన్ కార్యక్రమాలు చేస్తున్నారు. కానీ వచ్చే నెలకంతా ఇవి కొలిక్కి రావడం కష్టమేనని ఇన్ సైడ్ టాక్. ఆంధ్రప్రదేశ్ రాజకీయ వాతావరణ పరిస్థితుల దృష్ట్యా రిస్క్ అవుతుందని, పోలింగ్ ఇంకో నాలుగు రోజుల్లో పెట్టుకుని జనాలు థియేటర్లకు వచ్చే మూడ్ లో ఉండరని బయ్యర్లు చెబుతుండటంతో టీమ్ ఆలోచనలో పడింది. క్రమం తప్పకుండ చర్చలు జరుగుతున్నాయి కానీ ఒక నిర్ణయానికి రాలేకపోతున్నారు.

తాజాగా అందిన సమాచారం మేరకు కల్కి బృందం మే 30 రిలీజ్ ని పరిశీలనలో ఉంచినట్టు తెలిసింది. ఎలాగూ వేసవి సెలవులు జూన్ మూడో వారం దాకా ఉంటాయి కాబట్టి ఓపెనింగ్స్, కలెక్షన్ల గురించి టెన్షన్ అక్కర్లేదని ఎగ్జిబిటర్లు వివరించి చెప్పినట్టు సమాచారం. గతంలో బాహుబలి 2, కెజిఎఫ్ లాంటివి సమ్మర్ లోనే వచ్చి వసూళ్లు కొల్లగొట్టిన సంగతిని గుర్తు చేస్తున్నారు. మే 30 లోగా కొత్త ప్రభుత్వం వచ్చేస్తుంది. టిడిపి జనసేన పాలన వచ్చినా లేక వైఎస్ఆర్ పార్టీ కొనసాగినా అప్పటికంతా పొలిటికల్ హీట్ చల్లబడిపోయి ఉంటుంది కాబట్టి కల్కికి ఎలాంటి ఇబ్బంది ఉండదు.

ఇదంతా తేలడానికి కొంత టైం పట్టొచ్చు. ఏదైనా సరే కల్కి ఖచ్చితంగా వేసవిలోనే రావాలి. వేరే ఆప్షన్ ఆలోచిస్తే లేనిపోని ఇబ్బందులు తలెత్తుతాయి. ఇంకా ఓటిటి డీల్ అవ్వలేదు. టీజర్ వచ్చాక చేసుకుందామని పెండింగ్ లో ఉంచారు. పైగా నిర్మాత చెప్పిన భారీ రేటుకి సానుకూల స్పందన రాలేదట. టీజర్ వచ్చాక కంటెంట్ గురించి అవగాహన వస్తుంది కాబట్టి హెచ్చుతగ్గులు అప్పుడు చూసుకోవచ్చు. మే నెల ఎంతో దూరంలో లేదు. పాతిక రోజులు గడిస్తే వచ్చేస్తుంది. కల్కి టీమ్ నుంచి వీలైనంత త్వరగా ఏదో ఒకటి స్పష్టంగా తేల్చే కబురు వస్తే తప్ప ప్రభాస్ ఫాన్స్ రిలాక్స్ అవ్వలేరు