క్రీస్తుపై వ్యాఖ్యలు.. వివాదంలో హీరో

దేవుళ్లు, మతాల విషయంలో మాట్లాడేటపుడు కొంచెం ఆచితూచి వ్యవహరించాలి. అసలే ఇది సోషల్ మీడియా కాలం. చిన్న మాట తూలినా.. వివాదం అయిపోతుంది. కోట్లమంది మనోభావాలు తినేస్తాయి. సోషల్ మీడియాలో రచ్చ రచ్చ అయిపోతుంది. తాజాగా తమిళ నటుడు, సంగీత దర్శకుడు విజయ్ ఆంటోనీ చిన్న మాట తూలి వివాదంలో చిక్కుకున్నాడు.

ఓ సినిమా ప్రమోషన్లో భాగంగా మద్యం గురించి అతను మాట్లాడాడు. ఇందులో మహిళలు, పురుషులు అని తేడాలు చూడకూడదన్నాడు. మద్యం సేవించడం అన్నది అన్ని జాతుల్లో సర్వసాధారణమైన విషయమని పేర్కొన్నాడు. పురాతన కాలం నుంచి మద్యం సేవించడం ఉందని.. గతంలో సారా పేరుతో దాన్ని తాగేవారని.. ఆ తర్వాత బడా బడా కంపెనీలు రంగప్రవేశం చేసి రకరకాల బ్రాండ్లతో మద్యాన్ని అమ్ముతున్నాయని పేర్కొన్నాడు. 

ఇంత వరకు బాగానే ఉంది కానీ.. పురాతన కాలంలోనూ మద్యం తాగడం సాధారణమే అని చెబుతూ ఉదాహరణగా ఏసు క్రీస్తు కూడా ద్రాక్ష రసం తాగేవాడని పేర్కొన్నాడు. ఇది క్రైస్తవుల మనోభావాలను దెబ్బ తీసింది. తీవ్ర ఆగ్రహం వ్యక్తం చేస్తూ తమిళనాడు క్రైస్తవ సంఘం ప్రకటన విడుదల చేసింది.

క్రైస్తవుల మనోభావాలు దెబ్బ తీసిన విజయ్ ఆంటోనీ క్షమాపణ చెప్పకుంటే ఆందోళన చేపడతామని హెచ్చరించింది. దీంతో విజయ్ ఆంటోనీ వెంటనే ప్రకటన విడుదల చేశాడు. తన వ్యాఖ్యల పట్ల క్రైస్తవులకు బేషరతుగా క్షమాపణ చెప్పాడు. ద్రాక్ష రసం తాగడం రెండు వేల ఏళ్ల కిందటే ఉందని.. దేవాలయాలు, చర్చీల్లో కూడా దాన్ని వాడేవారని చెప్పానని.. తన వ్యాఖ్యలను తప్పుగా అర్థం చేసుకున్నారని.. ఎవరినైనా నొప్పించి ఉంటే మన్నించాలని అతను ఈ ప్రకటనలో కోరాడు.