సంక్రాంతి సినిమాల OTT డేట్లు

పండగ బాక్సాఫీస్ కు మంచి కిక్ ఇచ్చిన సంక్రాంతి సినిమాల ఓటిటి ప్రీమియర్ల కోసం అభిమానులు ఎదురు చూడటం మొదలైపోయింది. ఒక్క హనుమాన్ మినహాయించి మిగిలినవి బాగా నెమ్మదించిపోవడంతో ఇక డిజిటల్ లో రావడమే బాకీ. ముందుగా స్ట్రీమింగ్ అయ్యే ఛాన్స్ ఉన్నది ‘సైంధ‌వ్‌’కి. వెంకటేష్ ఫ్యాన్స్ ఎన్నో ఆశలు పెట్టుకున్న ఈ యాక్షన్ ఎమోషనల్ డ్రామా ఇంత తీవ్రంగా నిరాశ పరుస్తుందని ఎవరూ ఊహించలేదు. ఫిబ్రవరి 2 అమెజాన్ ప్రైమ్ లో రావొచ్చని డిజిటల్ టాక్. ఒకవేళ ఏదైనా చివరి నిమిషం మార్పు ఉంటే నెక్స్ట్ వీక్ కి వాయిదా పడొచ్చు.

నాగార్జునకి చాలా గ్యాప్ తర్వాత సూపర్ హిట్ అందించిన ‘నా సామిరంగ’ని ఫిబ్రవరి 15 డిజిటల్ వెర్షన్ వదిలే ఆలోచనలో ఉంది హాట్ స్టార్. ఇంకా కన్ఫర్మ్ చేయనప్పటికీ అప్పటికి థియేటర్ రన్ ముగింపులో ఉంటుంది కాబట్టి క్రేజ్ ని క్యాష్ చేసుకునే ఉద్దేశంలో ఇలా ప్లాన్ చేస్తోందని సమాచారం. ‘గుంటూరు కారం’ని సలార్ తరహాలో కేవలం ఇరవై ఎనిమిది రోజుల నిడివిలో స్ట్రీమ్ చేసే ఒప్పందం ఉంటే మాత్రం మహేష్ బాబుని ఫిబ్రవరి 9 నుంచే నెట్ ఫ్లిక్స్ లో చూసేయొచ్చు. లేదూ అంటే నలభై అయిదు రోజుల గ్యాప్ రెండో ఆప్షన్. దానికిచ్చిన రేట్ కి మొదటిదే జరిగే అవకాశం ఉంది.

ఇక సంక్రాంతి బిగ్గెస్ట్ బ్లాక్ బస్టర్ గా నిలిచిన ‘హనుమాన్’ని జీ5 సంస్థ మార్చి మూడో వారంకి షిఫ్ట్ చేసిందట. ముందైతే అగ్రిమెంట్ చేసుకునే టైంలో మూడు వారాలు చాలనుకున్నా ఇప్పుడు వచ్చిన అద్భుత స్పందన చూసి తేదీని మార్చుకున్నారట. సో ఇంకో నెలన్నరలో మొత్తం నాలుగు సినిమాలు నిక్షేపంగా ఇంట్లోనే కూర్చుని ఎంజాయ్ చేయొచ్చు. రెండు వారాలు ఆలస్యంగా తెలుగులో రిలీజైన కెప్టెన్ మిల్లర్ ఇంకో పది రోజుల్లో వచ్చేలా ఉంది. ఇక్కడ వాయిదా పడ్డ అయలాన్ కి సంబంధించిన యాడ్స్ ని సన్ నెక్స్ట్ యాప్ ప్రోమోట్ చేయడం మొదలుపెట్టింది. అతి త్వరలోనే ఉండనుంది.