ఫైటర్ ప్రభావం వార్ 2 మీద ఉండదు

ఇటీవలే విడుదలైన ఫైటర్ వసూళ్లు బాగానే ఉన్నాయి కానీ హృతిక్ రోషన్ రేంజ్ లో లేవన్నది కళ్ళముందు కనిపిస్తున్న వాస్తవం. పఠాన్ స్థాయిలో అభిమానులు అంచనాలు పెట్టుకుంటే వాటిని అందుకోవడంలో తడబడుతోంది. ఓవర్సీస్ లో బాగున్నప్పటికీ మాస్ మార్కెట్లలో ఎదురీదుతోంది. ముఖ్యంగా బిసి సెంటర్స్ ప్రేక్షకులు మొత్తం ఆకాశంలోనే జరిగే యుద్ధాన్ని ఆస్వాదించలేకపోతున్నారు. దీని తర్వాత హృతిక్ చాలా గ్యాప్ తీసుకోబోతున్నాడు. అతని నెక్స్ట్ మూవీ వార్ 2. దీని గురించి మనకింత ఆసక్తి ఎందుకంటే జూనియర్ ఎన్టీఆర్ చేస్తున్న మల్టీస్టారర్ కాబట్టి.

ప్రాక్టికల్ గా చూస్తే వార్ 2 రావడానికి ఇంకో ఏడాదిన్నర టైం ఉంది. అప్పటికంతా ఫైటర్ ని జనాలు మర్చిపోయి ఉంటారు. పైగా వార్ 2 యుద్ధ విమానాల నేపథ్యంలో ఉండదు. టెర్రరిజంని ఎదురుకునే హీరోయిజంకి కమర్షియల్ కోటింగ్ ఇచ్చి మతిపోయే యాక్షన్ బ్లాక్స్ తో కట్టిపడేస్తారు. అన్నింటి కన్నా ముఖ్యంగా వార్ 2 నిర్మాతలు యష్ రాజ్ ఫిలిమ్స్. నిర్మాత ఆదిత్య చోప్రా స్క్రిప్ట్ ని కాచి వడబోయడంలో సిద్ధ హస్తుడు. టైగర్ 3 విషయంలో ఆయన లెక్క తప్పినా కూడా మరీ డిజాస్టర్ కాలేదు. ఫైటర్ కు దర్శకుడు సిద్దార్థ ఆనంద్ అయితే వార్ 2 డైరెక్టర్ అయాన్ ముఖర్జీ. సో పోలిక లేదు.

ఎలా చూసుకున్నా ఫైటర్ ఎఫెక్ట్ వార్ 2 మీద పెద్దగా ఉండదు. పైగా వచ్చే సంవత్సరం ఆగస్ట్ లో రిలీజయ్యే నాటికి హైప్ వేరే లెవెల్ లో ఉంటుంది. తారక్ వల్ల తెలుగు రాష్ట్రాల్లో భారీ ఓపెనింగ్స్ ఆశించవచ్చు. యష్ టీమ్ చేసే ప్రమోషన్ల వల్ల అంతర్జాతీయ స్థాయిలో బజ్ వస్తుంది. చిత్రీకరణకు చాలా సమయం తీసుకుంటున్నారు కాబట్టి క్వాలిటీ ప్లస్ కంటెంట్ విషయంలో జాగ్రత్తలు తీసుకుంటారు. ఈసారి పాకిస్థాన్ తీవ్రవాదంని ఎక్కువ హైలైట్ చేయకుండా ఇతర అంశాలకు ప్రాధాన్యత దక్కేలా స్క్రిప్ట్ లో కొన్ని కీలక మార్పులు జరిగాయట. దేవర కాగానే జూనియర్ వార్ 2 సెట్స్ లో అడుగు పెడతాడు.