మోహన్ లాల్ సినిమాకు తెలుగు కష్టాలు

మల్లువుడ్ సీనియర్ స్టార్ హీరోల్లో ఒకరిగా ఇప్పటికీ తిరుగులేని ఫాలోయింగ్ కొనసాగిస్తున్న మోహన్ లాల్ తెలుగు ప్రేక్షకులకూ సుపరిచితుడే. 90 దశకంలో తన డబ్బింగ్ సినిమాలు చాలానే ఇక్కడ ఆడాయి. మనమంతాతో స్ట్రెయిట్ టాలీవుడ్ డెబ్యూ చేశాక ఆశించిన ఫలితం దక్కలేదు కానీ మంచి పేరైతే వచ్చింది. జూనియర్ ఎన్టీఆర్ తో కలిసి జనతా గ్యారేజ్ లో నటించాక మొదటి బ్లాక్ బస్టర్ ఖాతాలో పడింది. దీని తర్వాత లూసిఫర్ తో సహా చాలా చిత్రాలు అనువదించి రిలీజ్ చేశారు కానీ అవేవి కనీస స్థాయిలో ఆడియన్స్ కు రీచ్ కాలేకపోయాయి. ఇప్పుడు ఇంకోటి వస్తోంది.

మలైకొట్టయి వాలిబన్ జనవరి 25 ప్యాన్ ఇండియా భాషల్లో రిలీజ్ చేస్తున్నారు. రెండు భాగాలుగా రూపొందిన ఈ విజువల్ గ్రాండియర్ కి లిజో జోస్ పెల్లిషెర్రీ దర్శకత్వం వహించాడు. షూటింగ్ ఎప్పుడో పూర్తయినా రిలీజ్ లో ఆలస్యం జరిగింది. అయితే ఇక్కడి బయ్యర్లు దీని మీద అంతగా ఆసక్తి చూపించడం లేదని ట్రేడ్ టాక్. ఎందుకంటే అదే రోజున ధనుష్ కెప్టెన్ మిల్లర్ ని సురేష్, ఏషియన్ సంస్థలు జాయింట్ గా విడుదల చేస్తున్నాయి. అదే రోజు వస్తున్న హృతిక్ రోషన్ ఫైటర్ కి ఏపీ, తెలంగాణలో మంచి ప్లానింగ్ జరుగుతోంది. 26న శివ కార్తికేయన్ ఆయలాన్ వచ్చేస్తాడు.

ఇంత కాంపిటీషన్ కు తోడు హనుమాన్ జోరు అప్పటికి తగ్గే సూచనలు లేకపోవడం, నా సామిరంగ, గుంటూరు కారంల కొనసాగింపు లాంటి అంశాలు మలైకోట్టై వాలిబన్ కు ప్రతిబంధకంగా నిలుస్తాయి. ప్రత్యేకంగా హైదరాబాద్ వచ్చి ప్రమోషన్లు చేయాలనీ చూస్తున్న మోహన్ లాల్ ఇంకా ఏ నిర్ణయం తీసుకోలేదట. దీని కన్నా ఒక వారం వాయిదా వేసి ఫిబ్రవరి మొదటి వారంలో వస్తే బాగుంటుందనే ఆలోచన జరుగుతోంది కానీ దానికన్నా ఏదైతే అదయ్యిందని పోటీలో రావడానికే ఫిక్స్ అవ్వొచ్చట. హీరో తప్ప మనకు పరిచయమున్న ఆరిస్టులు ఇందులో ఎవరూ లేరు. మొత్తం కేరళ బ్యాచే.