అజయ్ భూపతి.. కసి చూపించాడు

అందరూ కొత్త వాళ్లు కలిసి చేసిన ‘ఆర్ఎక్స్ 100’ అనే సినిమా ప్రోమోలు చూసి ఇదేదో బూతు సినిమాలా ఉందనుకున్న వాళ్లే ఎక్కువమంది. ఆ సినిమాకు తొలి రోజు చాలా చోట్ల థియేటర్లు ఫుల్ అయిపోయాయంటే అందుక్కారణం.. ప్రోమోల్లో చూపించిన టెంప్టింగ్ విజువల్సే కారణం. సినిమాలో ప్రథమార్ధ:లో వచ్చే కొన్ని బోల్డ్ సీన్లు చూస్తే.. అది యువత కామోద్రేకాలకు రెచ్చగొట్టి క్యాష్ చేసుకునే బి-గ్రేడ్ సినిమాలా కనిపించింది. కానీ సినిమా అంతా అయ్యాక కానీ.. దాని ఇంపాక్ట్ అర్థం కాదు. కథానాయిక పాత్రను.. అందులోని మరో కోణాన్ని మైండ్ బ్లోయింగ్ అనిపించే రీతిలో ప్రెజెంట్ చేసి వావ్ అనిపించాడు దర్శకుడు అజయ్ భూపతి. ముఖ్యంగా రావు రమేష్-పాయల్ మధ్య ప్రి క్లైమాక్స్‌లో వచ్చే సీన్‌కు థియేటర్లు ఊగిపోయాయి. మొదట్లో ‘ఆర్ఎక్స్ 100’ చూసి దాని ప్రత్యేకతను చాలామంది అర్థం చేసుకోలేకపోయారు. కానీ కాల క్రమంలో అది కల్ట్ స్టేటస్ తెచ్చుకుంది.

‘ఆర్ఎక్స్ 100’ తర్వాత అజయ్ తన మీద పెరిగిన భారీ అంచనాలను అందుకోలేకపోయాడు. ‘మహాసముద్రం’లో తన మార్కు చూపించలేకపోయాడు. ‘ఆర్ఎక్స్ 100’లో మాదిరి ట్విస్టులు, షాక్‌లు ఆశిస్తే.. అలాంటివేమీ లేకుండా ఒక ఫ్లాట్ సినిమా తీసి నిరాశపరిచాడు. చాలామంది దర్శకుల్లాగే ద్వితీయ విఘ్నాన్ని ఎదుర్కొన్నాడు. దీంతో అతను ‘వన్ ఫిల్మ్ వండర్’ అయిపోతాడా అన్న సందేహాలు కలిగాయి. కానీ ‘మంగళవారం’తో ఆ సందేహాలకు తెరదించాడు. ఈ సినిమా టీజర్, ట్రైలర్ చూస్తేనే ఇందులో ఏదో ప్రత్యేకత ఉందని అర్థమైంది. ఇక సినిమా చూస్తే అంచనాలకు మించే ఔట్‌పుట్ ఇచ్చాడు అజయ్. ‘మంగళవారం’ చూసిన వాళ్లంతా చెబుతున్న మాట.. అజయ్ ఒక కసితో ఈ సినిమా తీశాడని. తొలి సినిమాలో మాదిరే హీరోయిన్ పాత్రను సెన్సేషనల్‌గా డిజైన్ చేశాడు. ఆ పాత్రను మళ్లీ పాయలే చేసింది. ఆమె కూడా ఆ పాత్రకు పూర్తి న్యాయం చేయడంతో ‘మంగళవారం’ ఒక స్పెషల్ ఫిలింగా నిలబడింది.

‘మంగళవారం’ సినిమాలో ఫ్లాష్ బ్యాక్ కొంచెం జీర్ణించుకోలేని విధంగా ఉంటుంది. అదొక యునీక్ కాన్సెప్ట్‌. కొన్ని సీన్లు పచ్చిగా అనిపిస్తాయి. అంత బోల్డ్‌గా, రస్టిక్‌గా ఒక కాన్సెప్ట్‌ను, లీడ్ రోల్‌ను ప్రెజెంట్ చేసి మెప్పించడం అంత తేలికైన విషయం కాదు. అలాంటి సీన్లు తీస్తున్నపుడు ప్రేక్షకులు తట్టుకోలేరేమో అని చాలామంది రాజీ పడిపోతారు. కానీ ఆ కాన్సెప్ట్‌ను బలంగా చెప్పాలంటే అలా చూపించడమే కరెక్ట్ అని బలంగా నమ్మి తీశాడు అజయ్. చాలామంది టచ్ చేయడానికి కూడా భయపడే కాన్సెప్ట్‌ను ఒక కన్విక్షన్‌తో తెరపై ప్రెజెంట్ చేసిన విధానం ఆకట్టుకుంటుంది. మామూలుగా తమిళ దర్శకులే ఇలాంటి కాన్సెప్ట్స్‌ను ఇలా డీల్ చేస్తుంటారు. ముందు పాయల్, పాత్రను ఆమెతో ముడిపడ్డ సన్నివేశాలు చూస్తే యూత్‌కు వెర్రెత్తించడానికి ఆ పాత్రను అలా డిజైన్ చేశాడా అనిపిస్తుంది. కానీ ‘ఆర్ఎక్స్ 100’లో మాదిరే అసలు కాన్సెప్ట్ అర్థమయ్యాక అభిప్రాయం మారుతుంది. కథానాయిక పాత్రను చూసి అయ్యో అనిపిస్తుంది. ఫ్లాష్ బ్యాక్‌తో రచయితగా, దర్శకుడిగా మంచి మార్కులు వేయించుకున్న అజయ్.. చివరి అరగంటలో ట్విస్ట్‌లతో ఉత్కంఠభరితంగా సినిమాను నడిపించి ప్రేక్షకులను ఎంటర్టైన్ చేశాడు. కమర్షియల్‌గా సినిమాను మంచి స్థాయిలో నిలబెట్టాడు. ‘ఆర్ఎక్స్ 100’ కంటే కూడా దర్శకుడిగా అజయ్ ఈ సినిమాతో ఎక్కువ పేరు, గౌరవం సంపాదించుకుంటున్నాడు. ‘మంగళవారం’ తర్వాత అజయ్ మీద అంచనాలు కచ్చితంగా పెరుగుతాయనడంలో సందేహం లేదు.