షారుఖ్ ముందు వాళ్లిద్దరూ మరగుజ్జులైపోయారు

అమితాబ్ బచ్చన్ తరం హవా ముగిశాక బాలీవుడ్‌ను సుదీర్ఘ కాలం ఏలింది ఖాన్ త్రయమే. షారుఖ్ ఖాన్, సల్మాన్ ఖాన్, ఆమిర్ ఖాన్.. ఈ ముగ్గురూ ఎవరికి వారే సాటి అన్నట్లు భారీ విజయాలు సాధించారు. తిరుగులేని స్టార్ డమ్, ఫ్యాన్ ఫాలోయింగ్, మార్కెట్ సంపాదించుకున్నారు. 90వ దశకం వరకు ఆమిర్ కంటే షారుఖ్, సల్మాన్ ఒక మెట్టు పైన ఉన్నట్లు కనిపిస్తే.. 2000 తర్వాత ఆమిర్ ఖాన్ స్పష్టమైన పైచేయి సాధించాడు. అలా అని మిగతా ఇద్దరినీ తక్కువ అంచనా వేయలేని పరిస్థితి.

ఒక టైం వరకు సల్మాన్, షారుఖ్ పోటాపోటీగా ఉన్నారు. ఐతే ఒక దశ దాటాకా షారుఖ్ హవా తగ్గింది. ఆమిర్ ఖాన్ ‘దంగల్’ లాంటి ఆల్ టైం హిట్ కొట్టి ఊపులో ఉంటే.. మరోవైపు సల్మాన్ ‘భజరంగి భాయిజాన్’, ‘సుల్తాన్’ లాంటి మెగా హిట్లు అందుకున్నాడు. వీరిని అందుకోవడం షారుఖ్‌కు అసాధ్యం అనే పరిస్థితి కనిపించింది. కానీ చూస్తుండగానే వేగంగా పరిస్థితులు మారిపోయాయి.

ఆమిర్ ఖాన్, సల్మాన్ ఖాన్ కింద పడటం.. షారుఖ్ అనూహ్యంగా రైజ్ అయి వాళ్లు అందుకోలేని స్థాయికి చేరిపోవడం జరిగిపోయాయి. చాలా గ్యాప్ తీసుకుని సినిమాలు చేసే ఆమిర్ గత ఏడాది ‘లాల్ సింగ్ చడ్డా’తో దారుణమైన అనుభవాన్ని ఎదుర్కొన్నాడు. ఆ సినిమా అతణ్ని ఎంతగా నిరాశకు గురిచేసిందంటే ఇప్పట్లో కొత్త సినిమా చేసే ఉద్దేశమే ఉన్నట్లు లేదు. ఉన్నట్లుండి ఒక్కసారిగా ఆమిర్ పరిస్థితి అగమ్య గోచరంగా మారింది. అతడి మార్కు సినిమాలు ఇప్పుడు వర్కవుట్ అయ్యేలా కనిపించడం లేదు.

ఇక సల్మాన్ విషయానికి వస్తే అతడి రొడ్డ కొట్టుడు సినిమాలతో జనాలకు మొహం మొత్తేసింది. ఎన్నో ఆశలతో ఇటీవలే రిలీజైన ‘టైగర్-3’ నిరాశ పరిచింది. ఇక షారుఖ్ ఈ ఏడాది ‘పఠాన్’తో బ్యాంగ్ బ్యాంగ్ రీఎంట్రీ ఇచ్చి ‘జవాన్’తో మరో భారీ విజయాన్ని అందుకున్నాడు. ఈ సినిమా వసూళ్లకు.. సల్మాన్, ఆమిర్ చిత్రాల కలెక్షన్లకు అసలు పొంతన లేదు. ఈ ఏడాది చివర్లో వచ్చే ‘డంకీ’తోనూ షారుఖ్ మరో పెద్ద హిట్ కొట్టేలా ఉన్నాడు. అతను ఇంతింతై అన్నట్లుగా ఎదిగిపోతుంటే.. తన ముందు ఆమిర్, సల్మాన్ మరగుజ్జుల్లా కనిపిస్తున్నారు.