జగపతిబాబు చాక్లెట్ కాఫీ వైరల్

లియో ఫస్ట్ హాఫ్ లో ప్రధానంగా చెప్పుకునే హైలైట్స్ లో విజయ్ పోషించిన పార్తీబన్ పాత్ర తన కాఫీ షాప్ లో సృష్టించే నరమేథం. రౌడీ గ్యాంగ్ లో సైకో ఒకడు వచ్చి అర్ధరాత్రి చాకొలేట్ కాఫీ అడగటమే కాకుండా రెస్టారెంట్ లో పని చేసే అమ్మాయిని దగ్గరకు తీసుకుని వేధించబోతాడు. అక్కడితో ఆగకుండా హీరో కూతురిని టార్గెట్ చేయడంతో విజయ్ గన్ను తీసుకుని ఎడాపెడా ముఠాని మొత్తం పాయింట్ బ్లాంక్ రేంజ్ లో కణితిలో బులెట్ దిగేలా కాల్చి పారేస్తాడు. అప్పటిదాకా శాంతమూర్తిలా కనిపించిన విజయ్ ఒక్కసారిగా వయొలెంట్ గా మారిపోవడం థియేటర్లో ఓ రేంజ్ లో పేలింది.

దీనికి జగపతిబాబుకి కనెక్షన్ ఏంటని డౌటా. అక్కడికే వద్దాం. 2010లో వచ్చిన గాయం 2లో అచ్చం ఇదే ఎపిసోడ్ ఉంటుంది. హోటల్ లో తనతో పాటు హర్షవర్ధన్ పని చేసుకుంటూ ఉండగా షాప్ క్లోజ్ చేసిన తర్వాత ఇద్దరు గూండాలు వస్తారు. మూశామని చెప్పినా సరే కాఫీ డిమాండ్ చేస్తారు. అయినా సరే ప్రశాంతంగా తయారు చేసి ఇచ్చేలోపు వాళ్లలో ఒకడు అమ్మాయిని దగ్గరికి తీసుకుని ఇబ్బంది పెడతాడు. దీంతో పెనుగులాట మొదలై జగ్గు భాయ్ ఇద్దరినీ పిస్టల్ తో లేపి పారేసి షాక్ తిన్న ఎక్స్ ప్రెషన్ తో కుప్పకూలిపోతాడు. లియోకి ఈ సీన్ కి ఎంత సారూప్యం ఉందో మళ్ళీ చెప్పనక్కర్లేదు.

2005లో హిస్టరీ అఫ్ వయొలెన్స్ ని స్ఫూర్తిగా తీసుకుని లియో రాసుకున్నానని దర్శకుడు లోకేష్ కనగరాజ్ టైటిల్ కార్డులోనే ఒప్పేసుకున్నాడు. గాయం 2 కూడా దాని నుంచి ఇన్స్ పిరేషన్ తీసుకున్నదే. కాకపోతే మొత్తం కథ కాకుండా సగం వాడుకుని సెకండ్ హాఫ్ లో గాయం మొదటి భాగం తాలూకు ట్విస్టులను వాడుకున్నారు. కానీ అవి సరైన రీతిలో పండకపోవడంతో సినిమా ఫ్లాప్ అయ్యింది. ఇప్పుడీ జగపతిబాబు వీడియోని నెట్టింట్లో వైరల్ చేస్తున్నారు. లోకేష్ కాపీ కొట్టాడని, తెలుగులో ఎప్పుడో తీశారని రెండింటి పోలికలను బట్టబయలు చేస్తున్నారు. ఇలాంటి టాపిక్స్ దొరకాలే కానీజనం మాములుగా చెలరేగిపోరు.