రీ రికార్డింగ్ హీరోయిజం మీద చిరు సెటైర్లు

ఇటీవలే భోళా శంకర్ తో కెరీర్ లోనే అతి పెద్ద డిజాస్టర్ అందుకున్న చిరంజీవి ప్రస్తుత ట్రెండ్ కి బోధపడుతున్నట్టు ఉంది. అయినా సరే కష్టపడే విషయంలో మారేది లేదంటున్నారు. ఇటీవలే ఓ సీనియర్ జర్నలిస్టు పాత్రికేయుల జీవితాల మీద రాసిన పుస్తకాన్ని మెగాస్టార్ తో లాంచ్ చేయించారు. ఈ సందర్భంగా జరిగిన చర్చా గోష్ఠిలో హీరోయిజం గురించి ప్రస్తావన వచ్చింది. ఇంత లేటు వయసులో ఒళ్ళు హూనం చేసుకుని డాన్సులు ఫైట్లు కాకుండా ఊరికే అలా నడుచుకుంటూ వచ్చి వెళ్తూ, డైలాగులు చెబితే సంగీత దర్శకుడు రీ రికార్డింగ్ ఎలివేట్ చేస్తే దాంతో పనైపోతోందని సెటైర్లు వేశారు.

ఇది ప్రత్యేకంగా ఫలానా సినిమా గురించని చెప్పలేదు కానీ ఫస్ట్ గుర్తొచ్చే పేరు మాత్రం జైలరే. దానికి అనిరుద్ రవిచందర్ చేసిన మేజిక్ చాలా లోపాలను కవర్ చేసిన సంగతి తెలిసిందే. ఇదని కాదు ఇలాంటి ఉదాహరణలు ఎన్నో ఉన్నాయి కానీ చిరంజీవి వయసు దృష్ట్యా పోలిక చూసుకుంటే రజనీకాంత్ గురించే ప్రస్తావించారని అనుకోవచ్చు. అలా అని సూపర్ స్టార్ ని ఆయనేం తక్కువ చేయలేదు. ఇప్పుడు ఆడియన్స్ వాటిని ఆదరిస్తున్నారు కాబట్టి ఆ ధోరణి ఫాలో కావడం గమనిస్తున్నామని, అంతే తప్ప అదేమీ తప్పని అనలేదు అలా అని ఇదే ఎల్లప్పుడూ ఉంటుందని చెప్పలేదు.

అయితే తాను అలా చేస్తే మాత్రం ప్రేక్షకులు ఒప్పుకోరని ఖచ్చితంగా నృత్యాలు పోరాటాలు ఉండాల్సిందేనని, కష్టం తప్పదని క్లారిటీ ఇచ్చారు. ఇది మంచి విషయమే కానీ అర్థవంతమైన స్క్రిప్ట్ లు, సరిగ్గా చూపించగలిగే దర్శకులు ఉన్నప్పుడు వాల్తేరు వీరయ్య, ఖైదీ నెంబర్ 150 లాంటి హిట్లు పడతాయి. రీమేకులు, గుడ్డిగా డైరెక్టర్లను నమ్మడాలు చేస్తే ఆచార్యలు భోళాలు తగులుతాయి. అభిమానులు సైతం చిరంజీవి ట్రెండీగా చూడాలని కోరుకుంటున్నారు. మెగా 157లో ఫాంటసీ జానర్ ని టచ్ చేస్తున్నారు కాబట్టి ఈసారి రిస్క్ పరంగా కాస్త ఎక్కువ పనే ఉండొచ్చు. డిసెంబర్ నుంచి రెగ్యులర్ షూటింగ్ మొదలయ్యే అవకాశముంది.