కెజిఎఫ్ భామకు బ్రేకివ్వాల్సింది టాలీవుడ్డే

అదేంటో కొందరికి ఎంత పెద్ద బ్లాక్ బస్టర్ పడ్డా అవకాశాలు రావు.  మరికొందరికి మొదటి సినిమా ఫ్లాప్ అయినా మోస్ట్ బిజీ హీరోయిన్ అయిపోతారు. ఫస్ట్ క్యాటగిరీలో కెజిఎఫ్ ఫేమ్ శ్రీనిధి శెట్టిని ఉదాహరణగా చెప్పుకుంటే రెండో విభాగంలో శ్రీలీలను ఎగ్జాంఫుల్ గా చెప్పుకోవచ్చు. యష్ సరసన రాఖీ భాయ్ భార్యగా తిరుగులేని పాత్ర దక్కించుకున్నా దాని వల్ల శ్రీనిధికి కలిగిన ప్రయోజనం పెద్దగా లేదు. గ్లామర్ ఒలకబోసే పాటలు లేకపోవడం, క్లైమాక్స్ లో చనిపోవడం లాంటి ప్రతికూలతలు ఇతర దర్శకులు తనను ఆప్షన్ గా పెట్టుకోనివ్వకుండా అడ్డుపడ్డాయి.

దీనికన్నా ముందు ఒప్పుకున్న విక్రమ్ కోబ్రా కనీస స్థాయిలో ఆడి ఉంటే కొంత ఊరట దక్కేది. అది డిజాస్టర్ కావడం మరింత దెబ్బ కొట్టింది. దీంతో ఒక్కసారిగా కెరీర్ ఊపందుకునే మార్గాలు తగ్గిపోయాయి. చీకట్లో చిరుదీపంలా ఒక మంచి టాలీవుడ్ ఆఫర్ తలుపు తట్టిందనే టాక్ అయితే ఇండస్ట్రీ వర్గాల్లో వినిపిస్తోంది. బాలకృష్ణ హీరోగా బాబీ దర్శకత్వంలో రూపొందబోయే యాక్షన్ డ్రామాలో జోడిగా తననే ఎంచుకున్నట్టు వినిపిస్తోంది. అధికారికంగా ప్రకటించకపోయినా ప్రాధమికంగా జరిగిన చర్చల్లో అంగీకారం జరిగిపోయింది. అఫీషియల్ గా చెప్పడానికి టైం పట్టొచ్చు.

భగవంత్ కేసరి రిలీజయ్యాకే దీని తాలూకు అప్డేట్స్ ని మొదలుపెట్టబోతున్నారు. ఒకవేళ నిజమైతే శ్రీనిధికి మంచి బ్రేక్ గానే చెప్పుకోవచ్చు. క్రేజీ యూత్ స్టార్లు ఆప్షన్ గా పెట్టుకోవడం లేదు కాబట్టి బాలయ్యతో కనక హిట్టు పడితే సీనియర్ల సరసన మరిన్ని ఛాన్సులు వస్తాయి. ఎలాగూ విక్రమ్ తో చేసిన అనుభవం ఉండనే ఉంది. శ్రీనిధికి మరో అడ్డంకి తను మూడు పదుల వయసు దాటేయడం. పాతిక నుంచి ఇండస్ట్రీలో ఉంటేనే బండి వేగంగా ఉంటుంది. అలాంటిది మొదటి హిట్టు పడేనాటికి ముప్పై క్రాస్ అయితే ప్రాక్టికల్ గా ఇదిగో ఇలాంటి ఇబ్బందులే తలెత్తుతాయి.