మెగా 156 మరీ ఇంత నెగిటివిటీనా

భోళా శంకర్ డిజాస్టర్ తర్వాత రెండు రోజులకే ఏదో చికిత్స కోసం ఢిల్లీ వెళ్లి తిరిగి వచ్చిన మెగాస్టార్ చిరంజీవి తన 156వ సినిమా దర్శకుడెవరో ఇంకా అఫీషియల్ గా కన్ఫర్మ్ చేయలేదు. కళ్యాణ్ కృష్ణ అనేది బహిరంగ రహస్యమే అయినా ఆ మధ్య పుట్టినరోజు సందర్భంగా వదిలిన పోస్టర్ లో మాత్రం పేరు ఇవ్వకుండా జాగ్రత్త పడ్డారు. అంటే ఏదో చర్చలు జరుగుతున్నాయనే సంకేతాలు ఇచ్చినట్టేగా. మెగా ఫాన్స్ ప్రస్తుతం పెద్దగా ఫామ్ లో లేని డైరెక్టర్లతో చిరు పనిచేయడాన్ని ఇష్టపడటం లేదు. కళ్యాణ్ కృష్ణకు హిట్లున్నా సరే అతను వరస సక్సెస్ లలో లేని మాట వాస్తవం.

ఇప్పుడా పేరుని బయటికి చెప్పేస్తే అభిమానులు మళ్ళీ ఎక్కడ ట్రోలింగ్ చేస్తారనే ఆలోచనతో వాతావరణం కాస్త నెమ్మదించాక అనౌన్స్ మెంట్ ఇవ్వాలనే ఆలోచనలో నిర్మాత సుస్మిత కొణిదెల ఉందట. అయితే దీనికి సంబంధించి ఎక్కడ ఏ ట్వీట్లు కనిపించినా ఫ్యాన్స్ మాత్రం నెగటివ్ ఫీడ్ బ్యాకే ఇస్తున్నారు. దీనికి బదులు యువి సంస్థ వశిష్టతో లాక్ చేసిన మెగా 157న ముందు షూటింగ్ చేయమని కోరుతున్నారు. ఇది అంత సులభంగా జరిగే పని కాదు. ఎందుకంటే 156 ఖచ్చితంగా సుస్మితకే చేయాలని ఆల్రెడీ కమిట్ మెంట్ జరిగిపోయింది. మార్చే ఛాన్స్ లేనట్టే .

కాకపోతే ఇంత నెగటివిటీని దాటుకుని బెస్ట్ కంటెంట్ ఇవ్వాల్సి ఉంటుంది. ముఖ్యంగా బ్రో డాడీ రీమేక్ అనే ప్రచారం సోషల్ మీడియాలో బాగా తిరిగింది. కాదని అఫ్ ది రికార్డు యూనిట్ సభ్యులు చెబుతున్నా జనాలకు నమ్మకం కుదరడం లేదు. ఓపెనింగ్ రోజు దీనికి సంబంధించిన క్లారిటీ ఇస్తే సగం సమస్య తీరిపోతుంది. బెజవాడ ప్రసన్న కుమార్ రాసిన ఫ్రెష్ స్టోరీ అని వినిపిస్తున్నా అదేదో ఓపెన్ గా చెప్పేస్తే ఏ గొడవ ఉండదు. బంగార్రాజు తర్వాత బాగా గ్యాప్ తీసుకున్న కళ్యాణ్ కృష్ణకి సరైన కథ కుదిరిస్తే నాగార్జునలాగే మెగాస్టార్ ని కూడా డీల్ చేయగలడు. చూడాలి మరి.