రాఘవ లారెన్స్‌తో లోకేష్ కనకరాజ్

ఈ కాంబినేషన్ వినగానే చాలామందికి షాకింగ్‌గా అనిపించొచ్చు. కమల్ హాసన్, విజయ్ లాంటి హీరోలతో సినిమాలు చేసి.. రజినీకాంత్‌తో సైతం ఓ కమిట్మెంట్ ఉన్న లోకేష్ కనకరాజ్ ఏంటి.. రాఘవ లారెన్స్‌తో సినిమా చేయడం ఏంటి అనే ప్రశ్న తలెత్తవచ్చు. ఐతే లోకేష్.. లారెన్స్‌తో సినిమా చేయబోతున్న మాట వాస్తవం. కానీ ఆ చిత్రానికి అతను దర్శకుడు కాదు. రైటర్ మాత్రమే.

లోకేష్ కనకరాజ్ కథ, స్క్రీన్ ప్లే అందిస్తున్న చిత్రంలో లారెన్స్ హీరోగా నటించబోతున్నాడు. ఇంతకుముందు అమలా పాల్‌తో ‘ఆమె’ సినిమా చేసిన రత్నకుమార్ ఈ సినిమాను డైరెక్ట్ చేయబోతున్నాడు. మరో విశేషం ఏంటంటే.. ఈ సినిమాలో లారెన్స్ సరసన నయనతార నటించబోతోంది. ఈ వెరైటీ కాంబినేషన్లో సినిమా ఓకే అయిపోయిందట. త్వరలోనే అనౌన్స్‌మెంట్ కూడా ఉండబోతోందట.

ఊర మాస్ సినిమాలు చేసే లారెన్స్‌‌ హీరోగా సినిమా చేయడానికి లోకేష్ ఓ కథ రాశాడన్నా కూడా ఆశ్చర్యమే. వీళ్లిద్దరి స్టైల్‌కు అసలు పొంతన ఉండదు. లోకేష్ సినిమాలో మాస్ ఉంటుంది కానీ.. అది చాలా స్టైలిష్‌గా, కొత్తగా ఉంటుంది. లారెన్సేమో మరీ నాటు సినిమాలు చేస్తుంటాడు. అతడి యాక్టింగ్ స్టైల్ మరీ ఓవర్‌‌గా ఉంటుంది. మరి ఇలాంటి కాంబినేషన్ అంటే ఆశ్చర్యం కలిగించే విషయమే.

‘ఆమె’ అనే బోల్డ్ సినిమా కంటే ముందు రత్నకుమార్ తెలుగు కుర్రాడు వైభవ్ రెడ్డి హీరోగా ‘మెయ్యాదమాన్’ అనే సినిమా చేశాడు. అది సూపర్ హిట్టయింది. ప్రస్తుతం లారెన్స్ ‘చంద్రముఖి-2’ను ప్రేక్షకుల ముందుకు తెచ్చే ప్రయత్నంలో ఉన్నాడు. ఈ చిత్రం సెప్టెంబరు 15న ప్రేక్షకుల ముందుకు రానుంది. ఓవైపు లేడీ ఓరియెంటెడ్ సినిమాలు చేస్తూ, మరోవైపు పెద్ద పెద్ద హీరోల సినిమాల్లో మాత్రమే నటిస్తున్న నయన్.. లారెన్స్‌కు జోడీగా నటించడం కూడా ఆసక్తి రేకెత్తించేదే.