ఇది కూడా ఆడితే సెన్సేషనే

టాలీవుడ్లో ఇప్పుడు చిన్న సినిమాల హవా నడుస్తోంది. మూడు వారాల కిందట ‘సామజవరగమన’ అనే చిన్న చిత్రం బాక్సాఫీస్ దగ్గర అద్భుత విజయాన్నందుకుంది. ఆ సినిమా థియేట్రికల్ రన్ ఇంకా కొనసాగుతోంది. రెండు వారాల పాటు ఆ సినిమా మంచి వసూళ్లు సాధించింది. ఓవరాల్‌గా రూ.50 కోట్ల గ్రాస్ మార్కుకు చేరువగా ఉన్న ఆ సినిమా.. యుఎస్‌లో ఏకంగా మిలియన్ డాలర్ల మార్కును టచ్ చేసింది.

ఇక గత వారాంతంలో వచ్చిన ‘బేబి’ అయితే బాక్సాఫీస్ దగ్గర ప్రకంపనలు రేపుతోందనే చెప్పాలి. వీకెండ్లో ఎవ్వరూ ఊహించని కలెక్షన్ నంబర్స్‌ను అందుకున్న ఆ చిత్రం.. వీక్ డేస్‌లో కూడా ఏమాత్రం వీక్ అవ్వకుండా సాగిపోతోంది. రెండు వారాల వ్యవధిలో ఇలా రెండు చిన్న సినిమాలు బాక్సాఫీస్‌ను కళకళాడించడం అరుదైన విషయం. బాక్సాఫీస్‌కు ఇంకా ఉత్సాహాన్నిస్తున్న విషయం ఏంటంటే.. ఈ వారం రాబోతున్న మరో చిన్న సినిమాకు మంచి బజ్ కనిపిస్తోంది.

టీవీ యాంకర్ టర్న్డ్ డైరెక్టర్ ఓంకార్ తమ్ముడైన అశ్విన్ బాబు హీరోగా నటించిన ‘హిడింబ’కు ఇటు ట్రేడ్ వర్గాల్లో, అటు ప్రేక్షకుల్లో మంచి బజ్ కనిపిస్తోంది. ఈ పేరుతో ఒక సినిమా తెరకెక్కుతున్న విషయం కూడా నెల ముందు వరకు చాలామందికి తెలియదు. నేరుగా ట్రైలర్‌తో ఆ సినిమా ప్రేక్షకులకు పెద్ద షాక్ ఇచ్చింది. మైండ్ బ్లోయింగ్ అనిపించే విజువల్స్, క్వాలిటీ, క్యూరియాసిటీ పెంచే కథాంశం ప్రేక్షకులను ఆశ్చర్యానికి గురి చేశాయి. ట్రైలర్ చూడగానే సినిమా చూడాలి అనే ఫీలింగ్ కలిగింది అందరికీ. కేవలం ఈ ఒక్క ట్రైలర్‌తోనే సినిమాకు హైప్ వచ్చింది.

ఇంతకుముందు అసాధ్యుడు, మిస్టర్ నూకయ్య, రన్ లాంటి సినిమాలు రూపొందించిన అనీల్ కన్నెగంటి ఈ చిత్రానికి దర్శకుడు. ‘సామజవరగమన’తో పెద్ద హిట్ కొట్టిన అనిల్ సుంకరనే ఈ చిత్రాన్ని కూడా ప్రొడ్యూస్ చేశాడు. ఆయన ఎంతో నమ్మకంగా ఈ సినిమాకు కూడా ముందే ప్రిమియర్స్ వేస్తున్నారు. ఈ సినిమాకు పాజిటివ్ టాక్ వస్తే మంచి వసూళ్లు రావడం, బాక్సాఫీస్ దగ్గర పెద్ద హిట్టవబోతున్న మరో చిన్న సినిమాగా నిలవడం ఖాయం. అదే జరిగితే నాలుగు వారాల వ్యవధిలో మూడు చిన్న సినిమాలు సూపర్ సక్సెస్ అయిన అరుదైన సందర్భం చూడబోతున్నట్లే.