థియేటర్లలోకి ‘దిల్ బేచారా’

థియేట్రికల్ రిలీజ్‌ను స్కిప్ చేసి హాట్ స్టార్‌లో నేరుగా రిలీజ్ చేసిన సినిమాకు ఇంకా థియేట్రికల్ రిలీజ్ ఏంటి అని.. ఈ హెడ్డింగ్ చూసి ఆశ్చర్యం కలుగుతోందా? ఇది నిజం.

ఇండియాలో థియేటర్లు ఎప్పుడు తెరుచుకుంటే అప్పుడు ఈ చిత్రాన్ని వాటిలో ప్రదర్శిస్తే ప్రదర్శించొచ్చు కానీ.. ఈలోపే సుశాంత్‌ చివరి సినిమాను వెండితెరపై చూసే అవకాశం కల్పిస్తున్నారు. ఆ అవకాశం న్యూజిలాండ్‌లోని భారతీయ సినీ ప్రేక్షకులకు దక్కుతోంది.

కరోనా దేశంలోకి అడుగు పెట్టి కూడా.. దాని ప్రభావం నుంచి చాలా త్వరగా, తక్కువ నష్టంతో బయటపడ్డ దేశాల్లో న్యూజిలాండ్ పేరే ముందు చెప్పుకోవాలి. కట్టుదిట్టమైన చర్యలతో, ప్రజల క్రమశిక్షణతో అక్కడి నుంచి కరోనాను పారదోలారు.

న్యూజిలాండ్ కరోనా ఫ్రీ కంట్రీగా మారి మూడు నెలలు దాటింది. అక్కడ ఆల్రెడీ థియేటర్లు సహా అన్నీ తెరిచారు. బాలీవుడ్ పాత, కొత్త సినిమాలు ప్రదర్శిస్తున్నారు. ఈ క్రమంలోనే సుశాంత్ చివరి సినిమా ‘దిల్ బేచారా’ను వెండితెరపై చూపించే ప్రయత్నం చేస్తున్నారు.

దీని తర్వాత ఆస్ట్రేలియాలో సైతం ‘దిల్ బేచారా’ను రిలీజ్ చేయడానికి సన్నాహాలు చేస్తున్నారు. కరోనా ప్రభావం తక్కువగా ఉండి, థియేటర్లు నడుస్తున్న వివిధ దేశాల్లో ఈ చిత్రాన్ని విడుదల చేసే అవకాశాలున్నాయి.

ఇండియాలో ఈ ఏడాది ఆఖరుకు థియేటర్లు తెరుచుకుంటాయని భావిస్తున్నారు. అప్పుడు ఈ చిత్రాన్ని సెలక్టివ్‌గా థియేటర్లలో రిలీజ్ చేసే అవకాశముంది. గత 24న హాట్ స్టార్‌లో రిలీజైన ‘దిల్ బేచారా’ అద్భుతమైన స్పందన రాబట్టుకున్న సంగతి తెలిసిందే.