బాక్సాఫీస్‌ను ప్రభాస్‌కు రాసిచ్చేశారు

భారీ బడ్జెట్ పెట్టి ఎంతో రిస్క్ చేసి తీసిన ఓ పెద్ద సినిమా వస్తుంటే.. బాక్సాఫీస్ దగ్గర కూడా అనుకూల పరిస్థితులు నెలకొనడం కీలకం. ఆ విషయంలో ప్రభాస్ కొత్త చిత్రం ‘ఆదిపురుష్’కు భలేగా కలిసొస్తోందనే చెప్పాలి. ముందు అనుకున్నట్లు సంక్రాంతికే రిలీజ్ అయి ఉంటే ఈ సినిమా పరిస్థితి ఏమై ఉండేదో చెప్పలేం. కానీ ఇప్పుడు మాత్రం ఆ చిత్రానికి బాక్సాఫీస్ దగ్గర పూర్తి అనుకూల పరిస్థితులు ఉన్నాయి.

వేసవిలో ఏ పెద్ద సినిమా లేక ప్రేక్షకులు కరవులో ఉన్నారు. దీనికి తోడు ‘ఆదిపురుష్’ రావడానికి ముందు కొన్ని వారాల పాటు బాక్సాఫీస్‌లో స్తబ్దత కనిపిస్తోంది. ఏ సినిమా కూడా థియేటర్ల వైపు ప్రేక్షకులను ఆకర్షించలేకపోతోంది. ‘ఆదిపురుష్’ రిలీజ్‌కు వారం ముందు వస్తున్న టక్కర్, విమానం సినిమాల మీద కూడా పెద్దగా అంచనాలు లేవు. ప్రేక్షకుల దృష్టంతా ‘ఆదిపురుష్’ మీదే కేంద్రీకృతం అయి ఉంది.

‘ఆదిపురుష్’ విడుదలయ్యే వీకెండ్లో తెలుగులోనే కాక వేరే భాషల్లో కూడా చెప్పుకోదగ్గ రిలీజ్‌లు లేవు. తర్వాతి వారం కూడా పోటీ ఉండే అవకాశాలు కనిపించడం లేదు. నెలాఖర్లో నిఖిల్ సినిమా ‘స్పై’ ఓ మోస్తరు అంచనాలతో రాబోతోంది. ‘ఆదిపురుష్’ అప్పటి వరకు నిలబడితే కలెక్షన్లు చాలా పెద్ద రేంజికే వెళ్లిపోతాయి. మొత్తంగా చూస్తే ప్రేక్షకుల మూడ్, బాక్సాఫీస్ పరిస్థితులు ‘ఆదిపురుష్’కు పూర్తి అనుకూలంగా ఉన్నాయన్నది స్పష్టం.

ఇక ఔట్ పుట్ ఎలా ఉంటుందన్నదాన్ని బట్టి సినిమా ఫలితం ఆధారపడి ఉంటుంది. ఇంకొక్క రోజులోనే ‘ఆదిపురుష్’ ప్రి రిలీజ్ ఈవెంట్ తిరుపతి వేదికగా భారీగా చేయబోతున్నారు. అప్పుడే రిలీజ్ ట్రైలర్ కూడా లాంచ్ చేయబోతున్నట్లు తెలుస్తోంది. ఈ ఈవెంట్‌తో సినిమాకు మరింత హైప్ పెంచితే ఓపెనింగ్స్ భారీ స్థాయిలో ఉంటాయి. రూ.500 కోట్ల బడ్జెట్లో తెరకెక్కిన ఈ చిత్రం థియేట్రికల్ హక్కులతోనే ఆ మేర బిజినెస్ చేస్తున్నట్లు సమాచారం.