ఈ టైపు కథలు మనవాళ్లు డీల్ చేయలేరా?

పత్రికల్లో రకరకాల కుంభకోణాల గురించి తరచుగా వార్తలు చూస్తుంటాం. చాలామంది రచయితలు, దర్శకులు ఆ వార్తల నుంచే కథలు పుట్టిస్తుంటారు. ఐతే ఈ వార్తలు చూసి ఏదో ఐడియా తట్టి ఎగ్జైట్ అయిపోతే సరిపోదు. వాటి నుంచి ఆసక్తికర కథాకథనాలు తీర్చిదిద్దాలి. మనకు తెలిసిన విషయాల నుంచే భలే సినిమా తీశారే అని ప్రేక్షకులకు అనిపించేలా చేయాలి. కానీ మనం వార్తల్లో చూసే కుంభకోణాల ఆధారంగా సినిమాలు తీయడంలో మన వాళ్లు వీక్ అనే చెప్పాలి.

ఈ విషయంలో బాలీవుడ్ వాళ్లు, అలాగే కోలీవుడ్, మాలీవుడ్ దర్శకులు మన వాళ్ల కంటే ఎప్పుడూ ముందుంటారు. ముఖ్యంగా వైట్ కాలర్ క్రైమ్స్ ఆధారంగా తమిళంలో ఎప్పుడూ మంచి మంచి సినిమాలే వస్తుంటాయి. తెలుగులోకి ‘అర్జున్ సురవరం’ పేరుతో రీమేక్ అయిన ‘కనిదన్’ సినిమాలో ఫేక్ సర్టిఫికెట్ల కుంభకోణాన్ని భలే చూపించారు. అలాగే ‘భద్రం’ పేరుతో అనువాదం అయిన ‘తెగిడి’ అనే సినిమాలో ఇన్సూరెన్స్ స్కామ్‌ను చూపించిన విధానం ఉత్కంఠభరితంగా ఉంటుంది.

అలాగే విశాల్ సినిమా ‘అభిమన్యుడు’లో సైబర్ క్రైమ్‌లు ఎలా ఉంటాయో ఒళ్లు గగుర్పొడిచేలా చూపించారు. ‘శతురంగ వేట్టై’లో చైన్ బిజినెస్ పేరుతో జరిగే అక్రమాలు భలేగా ప్రెజెంట్ చేశారు. తెలుగులో ఇలా రియల్ లైఫ్ వైట్ కాలర్ క్రైమ్స్‌ను పకడ్బందీగా చూపించిన సినిమాలు తక్కువే. ఇప్పుడు ‘నేను స్టూడెంట్ సర్’ సినిమాలో బ్యాంకుల్లో అన్ క్లైమ్డ్ అకౌంట్ల నేపథ్యంలో జరిగే నేరాల చుట్టూ కథను అల్లారు. ఐతే ఈ ఐడియా బాగుంది కానీ.. దాన్ని తెర మీద ఆసక్తికరంగా ప్రెజెంట్ చేయడంలో దర్శకుడు ఫెయిలయ్యాడు.

ఈ పాయింట్ చుట్టూ మొత్తం కథను నడపకుండా ఐఫోన్ చుట్టూ ఫస్టాఫ్ అంతా వేస్ట్ చేశాడు. చివరి అరగంటలో అన్‌క్లైమ్డ్ అకౌంట్ల స్కామ్ చుట్టూ కథను నడిపించిన విధానం ఆకట్టుకున్నప్పటికీ.. అంతకుముందు చూపించిందంతా పరమ బోరింగ్‌గా ఉండటం వల్ల సినిమా తేడా కొట్టేసింది. మంచి ఐడియాను వేస్ట్ చేశారనే ఫీలింగ్ కలిగింది. తెలుగు దర్శకులు ఇలాంటి సినిమాలు తీసేటపుడు పైన చెప్పిన తమిళ చిత్రాలను ఒకసారి రెఫర్ చేస్తే బెటరేమో.