మంచు మనోజ్ డబుల్ ధమాకా

ఒకప్పుడు చాలా బిజీగా ఉంటూ వరుసబెట్టి సినిమాలు చేస్తూ వచ్చిన మంచు మనోజ్.. ఐదేళ్ల పాటు సినిమా లేకుండా ఖాళీగా ఉండిపోతాడని ఎవ్వరూ ఊహించలేదు. 2017 చివర్లో వచ్చిన ‘ఒక్కడు మిగిలాడు’నే మనోజ ్ చివరి సినిమా. ఆ తర్వాత మూడేళ్ల పాటు సినిమా ఊసే ఎత్తని అతను.. మధ్యలో ‘అహం బ్రహ్మాస్మి’ పేరుతో సినిమాను అనౌన్స్ చేసి.. తర్వాత దాన్ని కూడా అటకెక్కించేసిన సంగతి తెలిసిందే.

ఐతే కొన్ని నెలల కిందట మనోజ్ మరో సినిమాను అనౌన్స్ చేశాడు. అదే.. వాట్ ద ఫిష్. ‘నేను మీకు తెలుసా’ సినిమాను గుర్తు చేస్తూ క్రేజీగా కనిపించింది ఈ సినిమా టైటిల్, ప్రి లుక్ పోస్టర్. ఈ రోజు మనోజ్ పుట్టిన రోజు. ఈ సందర్భంగా ‘వాట్ ద ఫిష్’‌కు సంబంధించి చిన్న టీజర్ లాంటి వీడియో ఒకటి వదిలారు.

అది క్రేజీ క్రేజీగా సాగిపోతూ.. మనోజ్ అభిమానులనే కాక విభిన్నమైన సినిమాలను ఇష్టపడే వారిని ఆకట్టుకుంది. సినిమా యనీక్‌గా, క్రేజీగా ఉండబోతోందని.. మనోజ్ ఈ సినిమాలో రకరకాల అవతారాల్లో కనిపించబోతున్నాడని సంకేతాలు ఇచ్చింది. ఈ చిత్రాన్ని వి అనే కొత్త దర్శకుడు రూపొందిస్తున్నాడు.

ఇదిలా ఉంటే.. పుట్టిన రోజు సందర్భంగా మనోజ్ నటించబోయే మరో కొత్త చిత్రాన్ని కూడా ప్రకటించడం విశేషం. భాస్కర్ బంటుపల్లి అనే కొత్త దర్శకుడు ఈ చిత్రాన్ని రూపొందించనున్నాడు. ఎల్ఎస్ ప్రొడక్షన్స్ బేనర్ ప్రొడక్షన్ నంబర్ 3. శ్రీనివాసులు, వేణుగోపాల్, మమత, ముళ్ళపూడి రాజేశ్వరి ఉమ్మడిగా నిర్మించే ఈ చిత్రానికి పెద్ద బడ్జెట్టే పెడుతున్నారట. ఇది కూడా ఒక వైవిధ్యమైన కథాంశంతోనే తెరకెక్కనుందట. కొన్నేళ్ల పాటు సినిమానే లేకుండా ఉండిపోయిన మనోజ్.. ఈ పుట్టిన రోజుకు రెండు కొత్త సినిమాల విశేషాలతో అభిమానులకు డబుల్ ధమాకా ట్రీట్ ఇవ్వడం విశేషమే.