ఏజెంట్ డిజాస్టర్ పట్ల అఖిల్ స్పందన

ఏజెంట్ డిజాస్టర్ ఫలితం తెలియడం ఆలస్యం రెండో రోజే దుబాయ్ వెళ్ళిపోయిన అఖిల్ ఎట్టకేలకు ట్విట్టర్ వేదికగా మనసు విప్పాడు. ఇంకో మూడు రోజుల్లో ఓటిటి స్ట్రీమింగ్ ఉన్న నేపథ్యంలో ఇలా ఓపెన్ కావడం విశేషం. సాధారణంగా యూత్ హీరోలు ఇంత పెద్ద ఫెయిల్యూర్ వచ్చినప్పుడు మౌనంతో కూడిన గ్యాప్ తీసుకోవడం సహజం. అందులోనూ అఖిల్ చాలా కష్టపడి చేసిన ప్యాన్ ఇండియా మూవీ ఇది. కనీసం యావరేజ్ అయినా ఫ్యాన్స్ ఇంత బాధపడే వారు కాదు. కానీ కనీసం సగం కూడా రికవరీ చేయలేనంత బ్యాడ్ గా ఫ్లాప్ కావడం అనూహ్యం. ఇంతకీ అఖిల్ ఏమన్నాడు

నా ప్రియమైన అభిమానులకు శ్రేయోభిలాషులకు ఇదే నా సందేశం. ఏజెంట్ కి ఒక రూపం తీసుకురావటానికి తమ జీవితాలని అంకితం చేసి కష్టపడిన నటీనటులకు, సాంకేతిక నిపుణులకు హృదయపూర్వక కృతజ్ఞతలు తెలియజేసుకుంటున్నాను. మా శాయశక్తులా మేం బెస్ట్ ఇవ్వడానికే ప్రయత్నించాం. కానీ దురదృష్టవశాత్తు మేము కోరుకున్నట్టు అది తెరపై ఆవిష్కృతం కాక మంచి సినిమా ఇవ్వలేకపోయాం. నాకు పూర్తి మద్దతుగా నిలిచిన నిర్మాత అనిల్ సుంకరకు స్పెషల్ థాంక్స్ చెబుతున్నాను. మమ్మల్ని నమ్మిన డిస్ట్రిబ్యూటర్లు, సపోర్ట్ చేసిన మీడియా అందరికీ ధన్యవాదాలు. ఇంత ప్రేమ ఎనర్జీని ఇచ్చినందుకు ఇంకా రెట్టింపు ఉత్సాహంతో మెరుగైన సినిమాతో వచ్చేందుకు ఇంకా ఎక్కువ ఎఫర్ట్ పెడతాను.

చాలా స్పష్టంగా అఖిల్ అక్కినేని తన మనసులో మాటలను చెప్పేశాడు. ఎక్కడా దర్శకుడు సురేందర్ రెడ్డి పేరుని నేరుగా ప్రస్తావించకపోవడం గమనార్హం. ఓటమిని ఒప్పుకోవడం అవసరమే. ముందు ముందు తప్పులు చేయకుండా ఇది పాఠం నేర్పిస్తుంది. వీలైనంత త్వరగా యువి క్రియేషన్స్ బ్యానర్ లో కొత్త దర్శకుడితో చేతులు కలపబోతున్న అఖిల్ దాని కోసం రెడీ అవుతున్నాడు. గత కొన్నేళ్లలో నిర్మాతతో పాటు హీరో ఇద్దరూ పబ్లిక్ ప్లాట్ ఫార్మ్ మీద తమ డిజాస్టర్ ని ఒప్పుకోవడం ఏజెంట్ విషయంలోనే జరిగింది. ఈ నిజాయితీ ఇకనైనా హిట్ ఇవ్వాలి