టాలీవుడ్ శకునం మారుతుందా?

సినిమాలకు బాగా కలిసొచ్చే లాంగ్ సీజన్ సమ్మర్. ఐతే కరోనా వల్ల రెండు సమ్మర్ సీజన్లు వేస్ట్ అయిపోయాయి. గత ఏడాదే మళ్లీ సాధారణ స్థితి రాగా.. భారీ అంచనాలు పెట్టుకున్న ఆచార్య, సర్కారు వారి పాట లాంటి చిత్రాలు తీవ్ర నిరాశకు గురి చేశాయి. ఆర్ఆర్ఆర్, కేజీఎఫ్-2 లాంటి భారీ చిత్రాలు మాత్రం బాగానే అలరించాయి.

ఈ సారి వేసవి మరింత హీటెక్కుతుందని అనుకుంటే.. ఈ సీజన్‌కు షెడ్యూల్ అయిన భారీ చిత్రాలు ఒక్కొక్కటిగా రేసు నుంచి తప్పుకున్నాయి. ఏ పెద్ద స్టార్ సినిమా లేని అరుదైన సమ్మర్ సీజన్‌ ఇదే అయింది. పోనీ మిడ్ రేంజ్ సినిమాలైనా ప్రేక్షకులను అలరిస్తున్నాయా అంటే అదీ లేదు. దసరా, విరూపాక్ష మాత్రమే ఆదరణ దక్కించుకున్నాయి. మిగతా సినిమాలన్నీ దారుణమైన ఫలితాలందుకున్నాయి. గత మూడు వారాలుగా పరిస్థితి మరీ ఘోరంగా ఉంది. ఏజెంట్, రామబాణం, కస్టడీ లాంటి క్రేజున్న సినిమాలు తీవ్రంగా నిరాశపరిచాయి. ఉగ్రం కాస్త పర్వాలేదనిపించింది.

వేసవి సీజన్ ముందుకు సాగేకొద్దీ కళ తప్పుతోంది. ఇలాంటి టైంలో ఒక చిన్న సినిమా ఆశలు రేపుతోంది. అదే.. అన్నీ మంచి శకునములే. టాలెంటెెడ్ ఫిలిం మేకర్ నందిని రెడ్డి రూపొందించిన ఈ చిత్రంలో సంతోష్ శోభన్, మాళవిక నాయర్ జంటగా నటించారు.

పేరుకే చిన్న సినిమా కానీ.. వైజయంతీ వారు చేసిన అగ్రెసివ్ ప్రమోషన్ల వల్ల.. ఆసక్తికర ప్రోమోల వల్ల ప్రేక్షకుల్లో ఈ చిత్రం బాగానే ఆసక్తి రేకెత్తిస్తోంది. క్లీన్ ఫ్యామిలీ ఎంటర్టైనర్ లాగా కనిపిస్తున్న ఈ చిత్రం కుటుంబ ప్రేక్షకులతో పాటు యువతను కూడా థియేటర్లకు రప్పించేలా కనిపిస్తోంది. కావాల్సిందల్లా.. మంచి టాక్ మాత్రమే. గురువారం రిలీజ్ కానున్న ఈ చిత్రానికి ఆ టాకే వస్తే బాక్సాఫీస్ దగ్గర పెద్ద విజయాన్నే అందుకునే అవకాశముంది. ఈ వారం డబ్బింగ్ మూవీ బిచ్చగాడు-2 కూడా వస్తున్నప్పటికీ దాని మీద పెద్దగా అంచనాలు లేవు.