శాక్రిఫయింగ్ స్టార్‌కు దేహశుద్ధి

సోషల్ మీడియాలో ఏం మాట్లాడినా చెల్లిపోతుంది.. యూట్యూబ్ ఛానెళ్ల ఇంటర్వ్యూలో ఎన్ని వేషాలేసినా నడిచిపోద్ది అనుకునేవారికి ఈ ఉదంతం ఒక గుణపాఠం లాంటిదే. సునిశిత్ అనే ఒక కుర్రాడు కొన్నేళ్ల నుంచి యూట్యూబ్ ఛానెళ్ల ఇంటర్వ్యూల్లో చెబుతున్న మాటలు, వేస్తున్న వేషాల గురించి సోషల్ మీడియాను ఫాలో అయ్యే వాళ్లకు బాగానే తెలిసి ఉంటుంది.

1 నేనొక్కడినే సినిమాలో నేనే హీరో.. ముందు నన్నే తీసుకున్నారు.. తర్వాత మహేష్ వచ్చాడు.. లావణ్య త్రిపాఠికి నాకు పెళ్లయింది.. నా వల్ల ఆమె ప్రెగ్నెంట్ కూడా అయింది.. తర్వాత విడిపోయాం.. ఇలాంటి మాటలే ఉంటాయి అతడి ఇంటర్వ్యూల నిండా. యూట్యూబ్ ఛానెళ్ల వాళ్లు కూడా.. ఇతను చెప్పేవన్నీ అబద్ధాలని తెలిసినా తనతో ఇంటర్వ్యూలు చేస్తుంటారు. అతను కూడా అవే మాటలు రిపీట్ చేస్తూ ఉంటాడు. అందుకే అతడికి ‘శాక్రిఫయింగ్ స్టార్’ అని నెటిజన్లు కామెడీగా ఒక ట్యాగ్ కూడా ఇచ్చారు.

ఇలాంటివి చూసి అందరూ నవ్వుకుని వదిలేయరు. సీరియస్‌గా తీసుకునేవాళ్లూ ఉంటారు. ఇటీవల రామ్ చరణ్ భార్య ఉపాసన గురించి కామెంట్లు చేశాడు. ఉపాసనతో లాంగ్ డ్రైవ్ వెళ్లా అని.. తాను చిరంజీవి అల్లుడు కావాల్సిన వాడినని.. ఇలా సాగాయి అతడి మాటలు. మెగా అభిమానులు ఈ కామెంట్లను అంత తేలిగ్గా తీసుకోలేదు.

కొందరు ఫ్యాన్స్ తాజాగా సునిశిత్‌ను ఎక్కడో ఒక చోట పట్టుకున్నారు. నలుగురైదుగురు అభిమానులు కలిసి అతణ్ని చితకబాదారు. ఇదంతా వీడియో కూడా తీశారు. తర్వాత అతడి ముందు మైక్ పెట్టి తాను చేసిన వ్యాఖ్యలకు క్షమాపణ కూడా చెప్పించారు. తనను చరణ్ అభిమానులు ఎందుకు కొట్టారో వివరిస్తూ.. తాను మాట్లాడింది తప్పని.. అందుకు చింతిస్తున్నానని.. ఇకపై ఎప్పుడూ ఇలాంటి వ్యాఖ్యలు చేయనని.. తప్పయిపోయిందని సునిశిత్ లెంపలేసుకున్నాడు.