పవన్.. అప్పుడు షాకులు, ఇప్పుడు సర్ప్రైజులు

పవర్ స్టార్ పవన్ కళ్యాణ్‌తో ‘గబ్బర్ సింగ్’ తర్వాత మరో సినిమా చేయాలని ఎప్పట్నుంచో ఎదురు చూస్తున్నాడు హరీష్. ఆశ్చర్యకరంగా ‘గబ్బర్ సింగ్’ సీక్వెల్ ‘సర్దార్ గబ్బర్ సింగ్’ను వేరే దర్శకుడి చేతిలో పెట్టిన పవన్.. తన కోసం హరీష్ చాలా ఏళ్లు ఎదురు చూసేలా చేశాడు. చివరికి నాలుగేళ్ల ముందు హరీష్‌తో సినిమాకు సూచన ప్రాయంగా అంగీకరించినా.. ఆ సినిమా పట్టాలెక్కడానికి చాలా టైం పట్టేసింది.

సినిమాకు టైటిల్ ప్రకటించి ఫస్ట్ లుక్ కూడా రిలీజ్ చేశాక ఏళ్లకు ఏళ్లు హరీష్ పవన్ కోసం ఎదురు చూడాల్సి రావడం షాకింగే. ఈ నిరీక్షణ వల్ల హరీష్ కెరీర్లో విలువైన కాలం వృథా అయింది. ఇదిగో అదిగో అనుకుంటూనే ఏళ్లకు ఏళ్లు గడిచిపోయాయి. పవన్ నుంచి ఇలాంటి రూడ్ షాక్స్ చాలా తిన్న హరీష్‌కు ఎట్టకేలకు కొన్ని నెలల కిందట సానుకూల స్పందన వచ్చింది. ఈ సినిమాకు ముహూర్త వేడుక జరిపారు. అలాగే గత నెల షూటింగ్ కూడా మొదలైంది.

పవన్ సెట్స్‌లోకి వచ్చే వరకు గ్యారెంటీ లేదు అన్నట్లుగా.. చిత్ర బృందం ఉత్కంఠతో ఎదురు చూడగా ఏప్రిల్ రెండో వారంలో పవన్ వారి నిరీక్షణకు తెరదించాడు. రెండు వారాల పాటు డేట్లు ఇచ్చి విరామం లేకుండా ఈ సినిమా షూటింగ్‌లో పాల్గొనడం హరీష్ అండ్ టీంకు పెద్ద సర్ప్రైజే. ఆ షెడ్యూల్ అవ్వగానే ‘ఓజీ’ షూట్ కోసం ముంబయి వెళ్లాడు పవన్. ముందు అనుకున్న ప్రకారం అయితే ఈ నెలలో ‘ఉస్తాద్ భగత్ సింగ్’ షూట్ ఏమీ లేదు. అందరూ రిలాక్స్ అయిపోయారు.

కానీ సడెన్ సర్ప్రైజ్ అన్నట్లు పవన్.. నెల మధ్యలో రెండు రోజులు డేట్లు ఇచ్చాడట. హరీష్ అండ్ టీంకు ఈ విషయం చెప్పేసరికి అందరూ ఆశ్చర్యపోయారట. హడావుడిగా ఆ రెండు రోజుల షూట్ కోసం సన్నాహాలు చేసుకుంటున్నారు. ఇంతకుముందు షాక్‌లే ఇచ్చిన పవన్.. ఇప్పుడు స్వీట్ సర్ప్రైజులు ఇస్తున్నాడని టీంలో జనాలు అనుకుంటున్నారు. మున్ముందు ఇలాంటి సర్ప్రైజులు ఇంకెన్ని ఇస్తాడో చూడాలి.