అఖిల్.. కింకర్తవ్యం?

అక్కినేని అభిమానుల బాధ ఇప్పుడు మామూలుగా లేదు. దశాబ్దాలుగా అక్కినేని ఫ్యానిజాన్ని ఎంజాయ్ చేస్తున్న వాళ్లకు ఇప్పుడు ఆ హీరోల ఫ్యాన్స్ అని చెప్పుకోవడానికి ఇబ్బందిగా ఉంది. ఇటు నాగార్జున.. అటు నాగచైతన్య, అఖిల్.. ఎవరూ కూడా సరైన ఫాంలో లేరు. ఫ్లాపులు ఎవ్వరికైనా సహజమే కానీ.. రోజు రోజుకూ అక్కినేని హీరోల క్రేజ్, మార్కెట్ పడిపోతుండటమే ఆందోళన కలిగిస్తోంది.

కేవలం తొమ్మిది నెలల వ్యవధిలో చైతూ ‘థాంక్యూ’, నాగ్ ‘ది ఘోస్ట్’, అఖిల్ ‘ఏజెంట్’తో దారుణమైన డిజాస్టర్లను ఎదుర్కొన్నారు. నాగ్, చైతూల కంటే కూడా అఖిల్ భవిష్యత్ అగమ్య గోచరంగా కనిపిస్తోంది. ‘ఏజెంట్’తో అతడి దశ తిరిగిపోతుందని.. పెద్ద మాస్ హీరో అయిపోతాడని అభిమానులు అనుకుంటే.. అసలు తర్వాత ఎలాంటి సినిమాలో తెలియని అయోమయంలో పడిపోయాడు అతను. అఖిల్‌తో పాటు నాగ్‌ను ఈ ప్రశ్న ఇప్పుడు తీవ్రంగా వేధిస్తోంది.

తొలి సినిమా ‘అఖిల్’తో మాస్ యాక్షన్ ట్రై చేశారు. అది వర్కవుట్ కాలేదు. ‘హలో’లో స్టైలిష్ యాక్షన్, లవ్ మిక్స్ చేసి సినిమా చేశారు. అదీ ఆడలేదు. ‘మిస్టర్ మజ్ను’తో పూర్తి స్థాయి లవ్ స్టోరీ ప్రయత్నించారు.. అదీ తేడా కొట్టేసింది. ‘మోస్ట్ ఎలిజిబుల్ బ్యాచిలర్’ అన్నింట్లోకి బెటర్ ప్రాడక్టే. కానీ ఆ సినిమా సక్సెస్ క్రెడిట్ అఖిల్‌కు ఏమాత్రం రాలేదు. హీరోయిన్ పూజా హెగ్డే, పాటలకే మేజర్ క్రెడిట్ వెళ్లిపోయింది. ఇక లాభం లేదని ఫుల్ లెంగ్త్ యాక్షన్ మూవీ ట్రై చేశారు. అఖిల్‌ను వైల్డ్ బీస్ట్ లాగా చూపించడానికి ప్రయత్నించారు. కానీ అది మరింత చేదు అనుభవాన్ని మిగిల్చింది. దీంతో ఇప్పుడు అఖిల్‌కు ఎలాంటి కథలు నప్పుతాయి.. అతను ఎలాంటి పాత్ర చేస్తే ప్రేక్షకులు మెచ్చుతారు అన్నది అంతుబట్టక అందరూ తలలు పట్టుకునే పరిస్థితి వచ్చింది. ‘ఏజెంట్’ మీద మంచి అంచనాలుండటంతో ఇండస్ట్రీలో కొందరు నిర్మాతలు, దర్శకులు అతడితో సినిమా చేసేందుకు ఆసక్తితోనే ఉన్నారు. కానీ ఈ సినిమా రిజల్ట్ చూశాక అందరూ భయపడుతున్నారు.

యువి క్రియేషన్స్‌లో ‘సాహో’కు అసిస్టెంట్ డైరెక్టర్‌గా పని చేసిన ఒక డెబ్యూ డైరెక్టర్‌తో అఖిల్ సినిమా ఉంటుందని ‘ఏజెంట్’ విడుదలకు ముందు ప్రచారం జరిగింది. కానీ ‘ఏజెంట్’ రిజల్ట్ తర్వాత నిజంగా ఈ ప్రాజెక్టు కార్యరూపం దాలుస్తుందా అన్న సందేహాలు తలెత్తున్నాయి. కథల విషయంలో కూడా ముందున్న ఆలోచన మారిపోయే ఛాన్సుంది. మరి అఖిల్ కోసం నాగ్ ఎలాంటి ప్లానింగ్‌లో ఉన్నాడో.. అతడి కెరీర్‌ను ఎలా సరిదిద్దుతాడో చూడాలి