చెల్లి సెంటిమెంటుతో కొత్త బిచ్చగాడు

అసలే అంచనాలు లేకుండా వచ్చి తెలుగు రాష్ట్రాల్లో సెన్సేషనల్ బ్లాక్ బస్టర్ గా నిలిచిన బిచ్చగాడుని మూవీ లవర్స్ అంత త్వరగా మర్చిపోలేరు. డబ్బింగ్ హక్కులను కేవలం యాభై లక్షలకు కొంటే ఇరవై కోట్లకు పైగా వసూలు కావడం అప్పట్లో మాములు సంచలనం కాదు. ఈ ఒక్క సినిమానే విజయ్ ఆంటోనీకి చాలా కాలం పాటు మార్కెట్ ని తెచ్చిపెట్టింది. ఎన్ని ఫ్లాపులు వచ్చినా ఏదో ఒకటి కొట్టకపోదా అనే నమ్మకంతో బయ్యర్లు వస్తూనే ఉన్నారు. సరే ఇవేవి వర్కౌట్ కావడం లేదని బిచ్చగాడు టైటిల్ కి 2 జోడించి వస్తున్నాడు విజయ్ ఆంటోనీ. ఇందాక ట్రైలర్ ని రిలీజ్ చేశారు.

భారతదేశంలో అత్యంత ధనవంతుల్లో ఒకడైన విజయ్ కురుమూర్తి(విజయ్ ఆంటోనీ) మీద ప్రత్యర్థుల కన్ను ఉంటుంది. లక్షల కోట్ల విలువైన సంపదను హస్తగతం చేసుకోవాలని కుట్రలు పన్నుతూ ఉంటారు. ఈలోగా అతని హత్య జరుగుతుంది. మర్డర్ చేసిన హంతకుడు అచ్చుగుద్దినట్టు అతని పోలికల్లోనే ఉండటం పోలీసులకు న్యాయశాఖకు సవాల్ గా మారుతుంది. అయ్యప్ప మాలలో అతి సామన్యుడిగా కనిపించే ఈ వ్యక్తికి గుండెలు పిండేసే ఫ్లాష్ బ్యాక్, అందులో ప్రాణంగా ప్రేమించిన చెల్లెలు ఉంటారు. ఇదంతా ఒకరి కథేనా లేక ఇద్దరున్నారానేది తెరమీద చూడాలి.

విజువల్స్ గట్రా గ్రాండ్ గా ఉన్నాయి. విజయ్ ఆంటోనీ ఎప్పటిలాగే తన మార్కు యాక్టింగ్ తో కంటిన్యూ అయ్యాడు. కావ్య థాపర్ హీరోయిన్ గా నటించిన ఈ క్రైమ్ కం సస్పెన్స్ డ్రామాలో ఎమోషన్లు గట్టిగానే దట్టించారు. తన స్వీయ దర్శకత్వంలోనే విజయ్ దీన్ని తెరకెక్కించడం విశేషం. ఓన్ ప్రొడక్షన్ కావడంతో బడ్జెట్ విషయంలో భారీతనం కనిపిస్తోంది. సంగీతం కూడా అతనే. ముందు మే 12 విడుదలనుకున్నారు కానీ పొన్నియిన్ సెల్వన్ 2కి హిట్ టాక్ రావడంతో ఇంకో వారం వాయిదా వేసి మే 19 రిలీజ్ చేయబోతున్నారు. అమ్మలాగే చెల్లి సెంటిమెంట్ ఏమేరకు వర్కౌట్ అవుతుందో చూడాలి.