అఖిల్ 4 నెలలనుకుంటే 10 నెలలు పట్టింది

అక్కినేని అఖిల్ తన కెరీర్లో అతి పెద్ద బాక్సాఫీస్ పరీక్షకు సిద్ధమవుతున్నాడు. హీరోగా తన కెరీర్లో ఇప్పటిదాకా పెద్ద సక్సెస్ చూడకపోయినా.. అతడి మీద భరోసాతో ఏకంగా రూ.80 కోట్ల బడ్జెట్ పెట్టి ‘ఏజెంట్’ సినిమాను నిర్మించాడు నిర్మాత అనిల్ సుంకర. స్టార్ డైరెక్టర్ సురేందర్ రెడ్డి ఈ చిత్రాన్ని రూపొందించాడు.

ఈ శుక్రవారమే ‘ఏజెంట్’ ప్రేక్షకుల ముందుకు రానుంది. అఖిల్ చూడ్డానికి సాప్ట్‌గా కనిపిస్తాడు కానీ.. ఈ సినిమాలో మాత్రం వైల్డ్ క్యారెక్టర్ చేశాడు. కళ్లు చెదిరే రీతిలో బాడీ పెంచి, వైల్డ్ లుక్‌లోకి మారిన అఖిల్.. వయొలెంట్‌గా కనిపించే పాత్రను పోషించాడు. ఈ పాత్ర కోసం తాను పడ్డ కష్టం గురించి అతను మీడియాతో మాట్లాడాడు.

తెర మీద కనిపిస్తున్న లుక్ కోసం అనుకున్న దాని కంటే చాలా ఎక్కువ టైమే పట్టిందని అఖిల్ తెలిపాడు. ‘మోస్ట్ ఎలిజిబుల్ బ్యాచిలర్’ చేస్తున్న సమయంలో ఏదో కొత్తగా చేయాలి అనే ఆలోచన కలిగి ‘ఏజెంట్’ చేసినట్లు అఖిల్ వెల్లడించాడు.

‘‘బేసిగ్గా నాకు యాక్షన్ సినిమాలంటే పిచ్చి. ఆ జానర్‌లో భారీ స్థాయిలో కొత్తగా ఏదైనా చేయాలని అనుకున్నా. ‘మోస్ట్ ఎలిజిబుల్ బ్యాచిలర్’ చేస్తున్నపుడు ఇంకా ఏదో చేయాలి అనిపించేది. అలా అని ఆ సినిమాను తక్కువ చేయను. ఆ కథ వరకు అది బాగుంటుంది. ఆ సమయంలో ఆత్మ విమర్శ చేసుకున్నాను. అందరికీ నేనేంటో తెలిసేలా స్పై యాక్షన్ థ్రిల్లర్ చేయాలనిపించింది. అప్పుడు సురేందర్ రెడ్డి కలిస్తే పుట్టిందే ఏజెంట్ కథ. ఈ సినిమా కోసం లుక్ మార్చుకోవాలని సూరి చెప్పాడు. నాలుగు నెలలు కష్టపడితే నేను కోరుకున్న బాడీ వచ్చేస్తుందని అనుకున్నా. కానీ ఆ ఆకృతి రావడానికి పది నెలలు పట్టింది. కోరుకున్న లుక్ వచ్చాకే తొలి సీన్ తీశారు. ఆలస్యమైనా సరే.. నేను పడ్డ కష్టం తెరపై కనబడుతుంటే చాలా సంతోషంగా ఉంది. సూరి కథ, సినిమాలో సీన్లు చెబుతున్నపుడు నేను చేయగలనా అనిపించింది. ముఖ్యంగా ఇందులో నన్ను హింసించే సీన్ విన్నపుడు ఇది నా వల్ల అవుతుందా అనుకున్నా. చివరికి అన్నీ చేయగలిగాను’’ అని అఖిల్ తెలిపాడు.