బాబీ భుజాల మీద సూపర్ స్టార్ బరువు

వాల్తేరు వీరయ్య లాంటి బ్లాక్ బస్టర్ సాధించాక దర్శకుడు బాబీ కొత్త సినిమా ఏదనే సస్పెన్స్ కొనసాగుతూనే వచ్చింది. అది విడుదలై మూడు నెలలు దాటినా ఇప్పటిదాకా అనౌన్స్ మెంట్ లేదు. ఇప్పుడు ఏకంగా సూపర్ స్టార్ రజనీకాంత్ ని డైరెక్ట్ చేసే ఛాన్స్ కొట్టేశాడనే వార్త ఫిలింనగర్ వర్గాల్లో చక్కర్లు కొడుతోంది. అది కూడా దిల్ రాజు నిర్మాత అనగానే అంచనాలు అప్పుడే మొదలైపోయాయి. అధికారిక ప్రకటన రాలేదు కాబట్టి ఖచ్చితంగా ఖరారు చేయలేం కానీ నిప్పులేనిదే పొగరాదనే సామెతను మర్చిపోకూడదు. అదే జరిగితే బాబీ నక్క తోక తొక్కినట్టే.

వరసగా మెగాస్టార్, తమిళ సూపర్ స్టార్ లను డీల్ చేయాల్సి రావడం చాలా కొద్దిమందికే దక్కే అదృష్టం. వినడానికి బాగానే ఉంది కానీ తలైవా ఇమేజ్ ని బాబీ మోయగలడా అనే సందేహాలు అభిమానులకు వస్తున్నాయి. ఎందుకంటే ఇతనికి హిట్లు ఎన్నున్నాయని పక్కనపెడితే యునానిమస్ గా కంప్లీట్ కమర్షియల్ ప్యాకేజ్ ని గొప్పగా డీల్ చేశాడనే పేరు ఎప్పుడూ రాలేదు. ఇద్దరు హీరోలున్నా వెంకీ మామ యావరేజ్ అయ్యింది. జై లవకుశ కథా కథనాల కంటే జూనియర్ ఎన్టీఆర్ టెర్రిఫిక్ పెర్ఫార్మన్స్ వల్ల ఎక్కువ ఆడింది. సర్దార్ గబ్బర్ సింగ్ గురించి తెలిసిందే.

పవర్ ఒకటే చెప్పుకోదగ్గ విజయం. మరి ఇలాంటి ట్రాక్ రికార్డుతో బాబీ రజినిని బాలన్స్ చేయడం అంత సులభం కాదు. ఎందుకంటే కోలీవుడ్ లో ఎంతో పేరున్న సిరుతై శివ(పెద్దన్న), మురుగదాస్(దర్బార్), కార్తీక్ సుబ్బరాజ్(పేట), పా రంజిత్(కాలా-కబాలి)లు ఆయన్ని సరిగ్గా వాడుకోలేక ఫ్లాప్ నుంచి సూపర్ హిట్ మధ్యలో ఫలితాలు అందుకున్నారు తప్ప యునానిమస్ బ్లాక్ బస్టర్లు కొట్టలేదు. మరి వాళ్ళ వల్లే కానిది బాబీ ఎంత మేరకు హ్యాండిల్ చేయగలడో చూడాలి. వాల్తేరు వీరయ్య చూసి రజిని సానుకూలంగా స్పందించారా లేక ఇంకేదైనా కారణముందా లెట్ వెయిట్ అండ్ సీ.