సోషల్ మీడియా ముసుగులో ఫ్యాన్స్ రచ్చ

హీరోల ఫ్యాన్స్ అభిమానం రాను రాను ముదిరి పాకాన పడుతోంది. సోషల్ మీడియాలో ఫేక్ ఐడిలతో అవతలి వాళ్ళను గేలి చేయడమే టార్గెట్ గా పెట్టుకుని పరస్పరం కవ్వించుకునే పనిలేని బ్యాచులు పెరిగిపోతున్నాయి. నిన్న అల్లు అర్జున పుట్టినరోజు సందర్భంగా చిరంజీవితో మొదలుపెట్టి జూనియర్ ఎన్టీఆర్ దాకా అందరూ ట్విట్టర్ లో విష్ చేసిన సంగతి తెలిసిందే. అయితే వీళ్లకు సమాధానం చెప్పే విషయంలో బన్నీ సమయపాలన కొంచెం అటుఇటు అయ్యింది. అంతే దానికి నానార్ధాలు తీసి ట్రోలింగ్ మొదలుపెట్టారు సదరు యాంటీ ఫ్యాన్స్.

చిరంజీవికి లేట్ గా బదులిచ్చాడని, తారక్ ని బావాని సంబోధించి పార్టీకి వస్తానని చెప్పాడని, చరణ్ ని కేవలం స్వీట్ బ్రదర్ అని సరిపుచ్చాడని ఇలా రకరకాల కారణాలతో నిందారోపణలు చేయడం మొదలుపెట్టారు. మెగా అల్లు కుటుంబాల మధ్య సాన్నిహిత్యం గురించి గత కొన్ని నెలలుగా ఏవేవో ప్రచారాలు జరుగుతూనే వచ్చాయి. అల్లు స్టూడియోస్ ప్రారంభోత్సవంలో ముఖ్య అతిథిగా మెగాస్టార్ రావడం, తన ప్రసంగంతో ఆకట్టుకోవడం, అల్లు అర్జున్ తదితరులంతా ఎంజాయ్ చేయడం ఇవన్నీ అందరూ యూట్యూబ్ వీడియోల సాక్షిగా చూసినవే.

అలీతో సరదాగా ఇంటర్వ్యూలో అల్లు అరవింద్ ఈ విషయం మీద క్లారిటీ కూడా ఇచ్చారు. అయినా అభిమానులు వీటితో సంతృప్తి చెందడం లేదు. బన్నీ మునుపటిలా లేడని మెగా ఫ్యాన్స్ అంటుంటే, లేదు చరణ్ వైపు నుంచే సమస్య ఉందని ఐకాన్ ఫాలోయర్స్ ఫిర్యాదు. వాస్తవం ఎవరికీ తెలియదు. వీళ్లందరి అభిప్రాయాలు తప్పయ్యే అవకాశాలే ఎక్కువగా ఉన్నాయి. అలాంటప్పుడు నిజాలు తెలియకుండానే ఇలా తొందపాటుతో ట్విట్టర్ లో కవ్వించుకునే ప్రయత్నాలు చేయడం సబబు కాదు. ఇదంతా అర్థం చేసుకునే పరిణితి ఉంటే ఈ సమస్య ఎందుకు వస్తుంది.