20 ఏళ్ళ ప్రస్థానంలో దిల్ రాజు మైలురాళ్లు

కాలంతో సంబంధం లేకుండా సినిమా నిర్మాణం ఎప్పుడూ రిస్క్ తో కూడుకున్నదే. కోట్ల రూపాయల పెట్టుబడికి ఎలాంటి గ్యారెంటీ ఉండదు. హిట్టయ్యిందా కనకవర్షం కురుస్తుంది. ఏదైనా తేడా కొట్టిందా పాతాళానికి దారి చూపిస్తుంది. అందులోనూ గత రెండు మూడు దశాబ్దాలుగా ఇండస్ట్రీలో వచ్చిన విపరీతమైన మార్పులు ప్రొడక్షన్ ని చాలా రిస్కీగా మార్చేశాయి. అందుకే విజయా లాంటి పెద్ద సంస్థలు ఎప్పుడో సెలవు తీసుకోగా వందకు పైగా చిత్రాలు తీసిన సురేష్ ప్రొడక్షన్స్ లాంటి బడా బ్యానర్లు ఆచితూచి అడుగులు వేస్తున్నాయి. ఇలాంటి ఒడిదుడుకులు ఎన్ని ఉన్నా వాటిని తట్టుకుని నిలబడి డిస్ట్రిబ్యూటర్ గా నిర్మాతగా విజయం సాధించడం ఆషామాషీ కాదు  

సరిగ్గా ఇరవై ఏళ్ళ క్రితం 2003లో వి వెంకటరమణారెడ్డి అనే వ్యక్తి అప్పటికే పంపిణిరంగంలో ఉన్న అనుభవం డబ్బుతో స్వంతంగా సినిమా  తీయాలని దిల్ మొదలుపెట్టారు. యూత్ లో క్రేజ్ ఉన్న నితిన్ హీరోగా మాస్ దర్శకుడిగా పేరున్న వివి వినాయక్ కాంబినేషన్ ని ప్రకటించడం చూసి ఇండస్ట్రీలో సన్నాయి నొక్కులు వినిపించాయి. కట్ చేస్తే దాని విజయం ఆ టైటిల్ నే ఇంటి పేరుగా మార్చింది. గంగోత్రిలో లుక్స్ విషయంలో విమర్శలు ఎదురుకున్న అల్లు అర్జున్ ని పూర్తిగా మేకోవర్ చేయించి సుకుమార్ అనే కుర్రాడు చెప్పిన కథని నమ్మి ఆర్య తీస్తే ఇప్పటికీ దాని వైబ్రేషన్స్ ఫ్యాన్స్ లో వినిపిస్తూనే ఉంటాయి. బోయపాటిని పరిచయం చేసిన భద్రదీ ఇదీ ఫలితం

ప్రేమకథలో ఫ్యామిలీ ఎంటర్ టైన్మెంట్ జోడించవచ్చని నిరూపించిన బొమ్మరిల్లు ఇప్పటికీ ఒక పాఠం లాంటిది. ప్యాన్ ఇండియా స్థాయికి చేరుకున్న వంశీ పైడిపల్లిని మున్నాతో తీసుకొచ్చింది రాజుగారే. బృందావనం, మిస్టర్ పర్ఫెక్ట్ లలో ప్రభాస్ తారక్ లాంటి స్టార్ హీరోలున్నా వాటిలో ఉన్నది పక్కా కుటుంబ అంశాలే. మరుగునపడిన మల్టీస్టారర్ సంస్కృతిని సీతమ్మ వాకిట్లో సిరిమల్లె చెట్టుతో ఊపిరిపోసింది  ఎస్విసి సంస్థనే. శేఖర్ కమ్ముల డైరెక్షన్ లో మెగా హీరో వరుణ్ తేజ్ తో ఫిదా రూపంలో బ్లాక్ బస్టర్ అందుకోవడం మాములు విషయం కాదు. జోష్, రామయ్య వస్తావయ్యా, కృష్ణాష్టమి లాంటి ఎదురుదెబ్బలన్నీ పాఠంగా తీసుకున్న అనుభవమది.

గేమ్ చేంజర్ లాంటి వందల కోట్ల ప్యాన్ ఇండియా మూవీతో సవాల్ స్వీకరించినా కేవలం కోటిన్నర బిజినెస్ చేసిన బలగంతో తెలంగాణ వ్యాప్తంగా నీరాజనాలు అందుకున్నా అది దిల్ రాజుకే సాధ్యమయ్యింది. ఇదంతా పొగడ్తల పర్వం కాదు. బాలీవుడ్ లో యష్ రాజ్ ఫిలింస్ లాంటి అతి కొద్ది బ్యానర్లే ఏళ్లతరబడి మనుగడ సాధ్యమవుతున్న వాతావరణంలో ఒక రీజనల్ ప్రొడ్యూసర్ మరోవైపు డిస్ట్రిబ్యూటర్ గా డ్యూయల్ రోల్ చేస్తూ సమర్ధవంతంగా భూమిక నిర్వహించడం చిన్న విషయం కాదు. అందరూ చూసేలా సినిమాలు తీయాలనే లక్ష్యమే ఆయన కంటెంట్ మీద ఏనాడూ ఫిర్యాదు రాకుండా చేసింది. దిల్ రిలీజై రెండు దశాబ్దాలు పూర్తి చేసుకోవచ్చు. కానీ దిల్ రాజు మాత్రం ఇప్పుడే కొత్తగా నవ యువకుడిగా ఉరకలేసిన ఉత్సాహంతో కనిపిస్తారు.